Amerikalik ayol eski-tuski buyumlar bozoridan $34,99 evaziga xarid qilgan byust bundan 2000 yil avval qadimgi Rimda yasalgan noyob haykal boʻlib chiqdi. Bu ayolning oʻzi uchun ham kutilmagan yangilik boʻlgan.

Laura Yang byustni 2018-yilda sotib olgan va oradan koʻp vaqt oʻtmay uning oddiy haykal emasligini tushunib yetgan. Ekspertlar Lauraning taxminlarini tasdiqlashdi. Maʼlum boʻlishicha, ayol sotib olgan byust bundan 2000 yil avval qadimgi Rimda yasalgan va bir vaqtlar Germaniyaning Ashaffenburg shahridagi muzeyda, Pompeydagi uy modeli ichida saqlangan. Uy modeli “Pompeyanum” deb atalgan va 1840-yilda Bavariya qiroli Lyudvig I tomonidan barpo etilgan. San-Antonio muzeyi ekspertlari haykalni Germaniyadan Texasga Ikkinchi jahon urushida ishtirok etgan askarlar olib kelgan boʻlishi mumkinligini taxmin qilishgan.

Eksponatning haqiqiy ekanligini tasdiqlangach, Laura Yang Germaniya hukumatini boʻlgan ishlardan ogoh etib, haykalni Bavariyadagi saroyga qaytargan. Undan avval esa byustni bir muddat oʻzi tugʻilib-oʻsgan San-Antonio Sanʼat muzeyida ham namoyish etishlarini soʻragan.

• Tarix
• artefakt
• qiziqarli