Bugun UEFA Chempionlar Ligasi chorak finalining dastlabki uchrashuvlariga start beriladi. 1/4 finalning eng markaziy bahsi deya e’tirof etilayotgan o‘yinda “Arsenal” o‘z uyida “Real Madrid”ni qabul qiladi.

Mikel Arteta boshchiligidagi “to‘pchilar” so‘nggi bosqichda PSV jamoasini umumiy 9-3 hisobida mag‘lub etib, chorak finalga yo‘l olgan edi. Biroq jamoa APLda jarohatlar sabab ko‘plab qiyinchiliklarga duch kelmoqda. Jumladan, muhim o‘yinchilardan Jesus, Sterling, Havertz, Gabriel, Kalafiori va Tomiyasu jarohatlar tufayli o‘yinda ishtirok eta olmaydi. Shuningdek, ba’zi futbolchilar keyingi uchrashuv uchun diskvalifikatsiya xavfi ostida. Shunga qaramasdan “Arsenal” uchun muhim jihat bu Bukayo Saka jarohatdan so‘ng safga qaytganidir. Hujumchi muhim o‘yinda jamoasiga yordam berishga tayyor.

Anchelotti shogirdlari 1/8 finalda hamshaharlari “Atletiko”ni penaltilar seriyasida mag‘lub etib, ushbu bosqichga yetib keldi. Ammo, jamoa yaqinda La Ligada “Valensiya”ga qarshi o‘yinda kutilmagan “tarsaki”ni qabul qilib oldi (1:2). “Qaymoqranglilar” uchun yaxshi xabar shundaki, darvozabon Kurtua jarohatdan qaytdi. Mbappe va Ryudiger esa UEFA tomonidan bo‘lgan diskvalifikatsiya tahdidiga qaramay, o‘yinda ishtirok etishlari mumkin. Chouameni sariq kartochkalari ko‘payib ketganligi bois birinchi o‘yinni o‘tkazib yuboradi.

Tarixiyga nazar solsak “Real Madrid” hech qachon “Arsenal”ni rasmiy o‘yinlarda mag‘lub eta olmagan.

Jamoalar o‘rtasidagi so‘nggi uchrashuvda, 2005/06-yilgi Chempionlar Ligasi doirasida, “Arsenal” ikki o‘yin natijasiga ko‘ra umumiy 1-0 hisobida g‘alaba qozongan.

Bugun, shuningdek, YeChL chorak finalidan o‘rin olgan “Bavariya” va “Inter” jamoalari o‘rtasidagi bahs ham bo‘lib o‘tadi. Ushbu ikki jamoa Yevrokuboklarda umumiy 9 marotaba to‘qnash kelgan, shundan 5 tasida mezbonlar, 3 tasida milanliklar ustun kelgan va yana bir o‘yin durang bilan yakunlangan.

Bugungi uchrashuvlarning har ikkisi 23:59 da start oladi.

Tayyorladi: Azimjon Shodmonov

• Arsenal
• Bavariya
• Chempionlar Ligasi
• Futbol
• Inter
• Real