Marvel kinostudiyasi o‘zining ajoyib, fantastik janrdagi filmlari bilan mashhur. Superqahramonlarning dunyoni qutqarish uchun kechadigan kurashlari  go‘yoki to‘xtamaydigandek. Har qanday franshizaning oxiri bo‘lishi mumkin, ammo Marvel filmlarining yakuni haqida o‘ylashning iloji yo‘q. Vaqt ham, borliq ham g‘ayrioddiy kuchga ega bo‘lgan qahramonlarning izmiga yuradigandek tuyiladi. Shu sababli ijrochilarning franshizani davom ettirishi uchun mavzu topa olmay qolishi ancha ishonarsiz ma’lumot. Bundan tashqari, Marvel har bitta superqahramon uchun alohida filmlarni tomoshabinlarga taqdim etib kelmoqda. Bugunga qadar “Qasoskorlar” filmining 4 ta qismi ekran yuzini ko‘rdi. Navbatdagi kartina 2026-yilda premyera qilinishi kutilmoqda. Hozir e’tiboringizga superqahramonlar ishtirokidagi eng yaxshi 10 ta filmni havola qilamiz.

10. “Chumoli odam va Ari” (2018)

Ushbu film “Chumoli odam”ning davomi bo‘lib, kinoteatrlarda ilk qismga qaraganda yomonroq natija ko‘rsatgan bo‘lsada, undagi mavzu ko‘plab tomoshabinlarni o‘ziga jalb qiladi. Film kvant olamining ta’siridagi sarguzashtlar haqida hikoya qiladi. Uning ahamiyati keyingi filmlarda yaqqol namoyon bo‘lgan. Aynan ushbu kartina Chumoli odamning Qasoskorlar qatoriga qo‘shilishida muhim rol o‘ynaydi.

9. “Galaktika qo‘riqchilari” (2014)

Film voqealari koinotni qutqarish uchun birlashishgan g‘alati va qarama-qarshi fazilatlarga ega bir guruh qahramonlar bilan kosmosda sodir bo‘ladi. Bundan tashqari, “Qasoskorlar-3: Abadiyat jangi” filmida ham ushbu superqahramonlar ishtirok etadi.

8. “Qora pantera” (2018)

“Qora pantera” boshqa barcha Marvel filmlari bilan solishtirganda ancha tomoshabopdir. U kino orqali go‘zal joyni tasvirlab beradi va siyosat bilan bog‘liq allaqachon mavjud muammolarni ko‘rsatadi. Bosh qahramon Chadvik Bosmanning vafotidan so‘ng, kartinaning davomi ko‘pchilikni o‘ylantirib qo‘ydi. Biroq 2022-yilda “Qora pantera: Abadiy Vakanda” filmi tomoshabinlarga taqdim etildi.

7. “Doktor Strenj: Aqlsiz multiolam” (2022)

Film Marvel’ning keyingi yurishlari uchun ko‘prik vazifasini o‘tadi. Unda borliqdagi sanoqsiz olamlar haqida hikoya qilinadi. Aynan ushbu ssenariy kelajakda Marvel’ga juda qo‘l keladi. Film dastlabki qismi bilan solishtirganda ancha qiziqarli ishlangan. Bosh qahramon Benedikt Kamberbetch takabburona ijrosi bilan ushbu rolga munosib ekanligini yana bir bor isbotlaydi.

6.“O‘rgimchak odam: Uyga qaytish” (2017)

Toni Stark va Piter Parker o‘rtasidagi ijobiy munosabatlar boshlagan filmni yaxshi eslasangiz kerak. Aynan ikkala qahramonning ota-o‘g‘ildek yaqin bo‘lishi kartinani yanada qiziqarli qilgani ajab emas. Unda quvnoq o‘smir hayotdagi o‘z o‘rnini topishga harakat qilayotgandek ko‘rinadi. 

5.“Tor-3: Ragnaryok” (2017)

Ushbu film kartinaning  eski versiyalariga qaraganda ancha katta qiymatga ega edi. Ajoyib aktyorlar tarkibi va istiqbolli hikoyalar chizig‘i tomoshabinlar uchun ancha hayajonli bo‘ldi. 2017-yilda ekran yuzini ko‘rgan bu film eskilariga qaraganda ko‘proq qadrlandi. Biroq 2022-yilda taqdim etilgan “Tor-4: Sevgi va momaqaldiroq” filmi bu qadar yuqori natijaga erisha olmadi.

4. “Kapitan Amerika: Fuqarolar urushi” (2016)

Bu filmda ikkita superqahramon Kapitan Amerika hamda Temir odam o‘rtasidagi qarama qarshilikni ko‘rishimiz mumkin. Ikkala qahramon ham o‘ziga yarasha kuch, salohiyat hamda muxlislarga ega edi. Kartina nafaqat ularning kuchli tomonlarini, balki zaif va yovuz tomonlarini ham ko‘rsatib beradi.

3. “Qasoskorlar: Abadiyat jangi” (2018)

“Abadiyat jangi” muxlislar uchun kutilmagan yakunni taqdim etdi. Yovuz qahramon Tanos tomonidan superqahramonlarning bir qismi va dunyo aholisining yarmi yo‘q bo‘lib ketadi. Filmdagi bunday voqealik uning reytingimizda yuqori o‘rinda turishini belgilab berdi.

2. “Temir odam” (2008)

Ushbu kartinani butun bir Marvel franshizalari uchun asos desak bo‘ladi. Chunki bu film Marvel’ni tomoshabinlarga yanada tanitgan, ularning mehrini qozongan film edi.

1. “Qasoskorlar: Intiho” (2019)

Hozircha “Qasoskorlar”ning so‘ngisi bo‘lib turgan bu kino dunyodagi eng ko‘p mablag‘ keltirgan filmlar qatorida turadi. Shuningdek ushbu kartinada bir vaqtning o‘zida barcha franshizalardagi superqahramonlarni ko‘rishimiz mumkin.

• Kino
• Lifestyle
• qiziqarli