2023-yil 7-oktyabrdan boshlab Isroil armiyasining G‘azo sektoriga hujumlari natijasida halok bo‘lgan falastinliklar soni 62 895 taga yetdi. So‘nggi bir kun ichida 76 kishi eksklavda Isroil hujumlari qurboniga aylandi. Bu haqda Anadolu xabar berdi.

Falastin sog‘liqni saqlash vazirligining G‘azo sektoridagi bayonotiga ko‘ra, mintaqada davom etayotgan Isroil hujumlari natijasida so‘nggi 24 soat ichida G‘azo sektori kasalxonalariga 76 ta jasad va 298 nafar yaralangan insonlar olib kelingan.

2025-yil 18-martdan beri ya’ni 19-yanvarda kuchga kirgan sulh bitimi buzilganidan keyin Isroil armiyasi tomonidan sodir etilgan hujumlarda halok bo‘lganlar soni 10 050 nafarga, yaradorlar esa 46 886 nafarga yetgan.

Xabar qilinishicha, so‘nggi bir kun ichida 18 nafar falastinlik yordam olishga urinishda halok bo‘lgan va 106 kishi jarohat olgan.

27-maydan boshlab Isroil va AQSh rahbarligida tashkil etilgan yordam tarqatish punktlari deb nomlangan hududlarda Isroilning muntazam hujumlari natijasida halok bo‘lganlar soni 2158 kishiga, yaralanganlar soni esa 15 843 kishiga yetgan.

2023-yil 7-oktyabrdan beri Isroilning G‘azo sektoriga qilgan hujumlarida halok bo‘lgan falastinliklarning umumiy soni 62 895 nafarni, yaralanganlar soni esa 158 927 nafarni tashkil etdi.

So‘nggi 24 soat ichida G‘azo kasalxonalarida to‘yib ovqatlanmaslik va ochlikdan 10 kishi, shu jumladan bolalar vafot etgan. Shunday tariqa, ochlikdan halok bo‘lganlar soni 313 nafarga yetgan bo‘lsa, ulardan 119 tasi bolalardir.

Ta’kidlanishicha, G‘azo sektoridagi vayronalar ostida hali ham minglab halok bo‘lganlarning jasadlari qolib ketmoqda.

• Falastin
• Isroil
• Qurbon
• Urush