“Kapitalbank” ATB aksiyalarining nazorat paketi yangi egasi nomi maʼlum bo‘ldi.

“Toshkent” respublika fond birjasi maʼlumotlariga ko‘ra, rossiyalik tadbirkor Alisher Usmonovga tegishli bo‘lgan USM Holding kompaniyasi qoshidagi “Telekominvest” kompaniyasi bankning yangi sohibiga aylangan.

“Telekominvest” hamda unga affillangan va O‘zbekistonda ro‘yxatdan o‘tgan “Finance TCI” MChJ Kapitalbank ustav kapitalining 58,33 foiz aksiyalariga egalik qilmoqda.

24-yanvar kuni “Toshkent” respublika fond birjasida tashkillashtirilgan savdoda “Finance TCI” MChJ bankning 32 986 653 dona oddiy aksiyani 108,45 mlrd. so‘mga sotib olgan. Kapitalbankning bir dona oddiy aksiyasi 3 287,7 so‘mdan yoki o‘zining nominal qiymatidan 3,46 barobar qimmatroqqa sotilgan. Birja maʼlumotlari Rossiyaning “Telekominvest” kompaniyasida Kapitalbankning 50 foiz aksiyalari borligini tasdiqlamoqda.

Kapitalbank aksiyalari o‘zining bozor qiymatida “Toshkent” RFB orqali sotildi. Birjada yanvar oyi mobaynida bir necha bitimlar tuzildi. 24-yanvar holatiga ko‘ra, bankning bozor bahosi 1,3 trln. so‘mni tashkil qilmoqda. 

Ochiq maʼlumotlarga ko‘ra, “Finance TCI” masʼuliyati cheklangan jamiyati 2019-yilda tashkil etilgan. Turar joy binolarini qurishga ixtisoslashgan kompaniyaga 100 ulush bilan “USM HK” kompaniyasi egalik qiladi. Finance TCI rahbari sifatida ko‘rsatilgan Maygur Andrey Aleksandrovich ayni paytda “ICS Holding Uzbekistan” MCHJning ham rahbari sanaladi. “ICS Holding Uzbekistan” MChJ esa Alisher Usmonovning USM Holdings tarkibiga kiruvchi O‘zbekistondan ro‘yxatdan o‘tgan “Digital Holding” MChJ QK tarkibiga kiradi. Digital Holding portfelida ICS Holding Uzbekistan‘dan tashqari “Coscom” MChJ (Ucell savdo belgisi)ning 100 foizlik ulushi, maʼlumotlarni joylashtirish va ishlov berish bo‘yicha xizmatlar ko‘rsatuvchi “CRPT Turon” MChJlar bor.

• Alisher Usmonov
• Kapitalbank