Bugun futbol olamining e’tibori Manchester shahriga qaratilgan. Angliya Premyer Ligasi (APL)ning 32-turi doirasida, tarixiy “Old Trafford” stadionida, ashaddiy raqiblar — “Manchester Yunayted” va “Manchester Siti” jamoalari o‘zaro to‘qnash keladi. O‘yin Toshkent vaqti bilan 20:30 da boshlanadi.

O‘yin ahamiyati

“Manchester Siti” chempionlik uchun kurashidan allaqachon chiqib bo‘lgan, endilikda jamoa mavsum yakunida kuchli to‘rtlikda qolish va 2025/26-yilgi YeChL yo‘llanmasi uchun kurashmoqda, bu esa Gvardiola jamoasi bugungi o‘yinda faqat 3 ochko uchun maydonga tushishini anglatadi.

“Manchester Yunayted” esa ushbu mavsumda ancha yomon ko‘rsatgichlarga ega, jamoa ayni dam APL turnir jadvalida 13-pog‘onada bormoqda, YeChL zonasi endi deyarli qo‘l yetmaydigan masofada. Bugungi derbi “Qizil iblislar” uchun mavsumdagi yana bir muhim sinovlardan biri bo‘ladi.

Bugungi bahsda “Shaharliklar” safida o‘zbekistonlik himoyachi Abduqodir Husanov ham asosiy tarkibda maydonga tushishi taxmin qilinmoqda, sababi Angliya chempionatining o‘tgan turi Pep Husanovni uchrashuv qaydnomasiga ham kiritmagan edi. Buning sababi o‘laroq futbolchiga “katta” o‘yindan avval biroz dam berilgani aytildi.

Ma’lumot uchun, Manchester derbisi doirasida umumiy 185 uchrashuv bo‘lib o‘tgan. “Man Yunayted” 75 marotaba, “Man Siti” esa 59 bor g‘alaba qozongan va yana 51 ta bahsda kuchlar teng kelgan.

Eng yirik hisob: “Man Yunayted” 6-1 “Man Siti” (2011) “Old Trafford”da.

• Abduqodir Husanov
• Futbol
• Manchester Siti
• Manchester Yunayted