O‘zbekistonda 2026-yilning birinchi yarmida sudlar tomonidan ozodlikdan mahrum qilish jazosi tayinlanganlar soni 22 foizga oshdi. Bu haqda Oliy sud ma’lum qildi.

Yanvar–iyun oylarida mamlakat sudlari tomonidan 11 ming 703 nafar shaxs ozodlikdan mahrum qilingan. O‘tgan yilning mos davrida bu ko‘rsatkich 9 ming 570 nafarni tashkil etgan. Shunday qilib, joriy yilda qamoq jazosiga hukm qilinganlar soni 2 ming 133 nafarga ko‘paygan.

Hududlar kesimida eng yuqori ko‘rsatkich Toshkent shahrida qayd etilgan — 2 030 nafar. Keyingi o‘rinlarda Farg‘ona viloyati 1 462 nafar va Toshkent viloyati 1 452 nafar bilan qayd etilgan. Eng kam ko‘rsatkich Qoraqalpog‘istonda bo‘lib, bu yerda 317 nafar shaxs ozodlikdan mahrum qilingan.

Hisobot davrida Toshkent shahrida ikki nafar shaxsga umrbod ozodlikdan mahrum qilish jazosi tayinlangan.

Ozodlikdan mahrum qilinganlar orasida 179 nafari qasddan odam o‘ldirish, 1 376 nafari qasddan badanga og‘ir yoki o‘rtacha og‘irlikdagi tan jarohati yetkazish, 1 789 nafari bezorilik, 5 788 nafari esa giyohvandlik bilan bog‘liq jinoyatlar uchun sudlangan.

Shuningdek, 2026-yilning birinchi yarmida korrupsiyaga oid jinoyatlar bo‘yicha 3 605 nafarga yaqin shaxs sudlangan. Ularning 779 nafari ozodlikdan mahrum qilingan, 614 nafariga jarima, 1 479 nafariga axloq tuzatish ishlari va 711 nafariga ozodlikni cheklash jazosi tayinlangan.