Toshkent viloyati Bo‘stonliq tumanidagi Chorvoq suv omborida cho‘kib ketgan ota va uning ikki o‘g‘lini qidirish ishlari davom etmoqda. Bu haqda Favqulodda vaziyatlar vazirligi ma’lum qildi.

Hodisa 2-sentyabr kuni sodir bo‘lgan. Dastlabki ma’lumotlarga ko‘ra, oila katerda suv omborida sayr qilgan. Ular cho‘milish taqiqlangan hududda to‘xtab, suvga tushgan. Cho‘milish vaqtida uch kishining oyog‘ida tomir tortishib, ular suvga cho‘kib ketgan.

FVV ma’lumotiga ko‘ra, fuqarolar cho‘milish vaqtida qutqaruv jiletlaridan foydalanmagan. Katerni boshqargan shaxs ularga jiletsiz suvga tushmaslikni tavsiya qilgan, biroq bu ogohlantirishga amal qilinmagan.

Voqea vaqtida katerda erkakning turmush o‘rtog‘i va singlisi ham bo‘lgan. Ular yordam so‘ragan. Kater haydovchisi ham suvga tushib, fuqarolarni qutqarishga uringan, biroq ularni qutqarishning imkoni bo‘lmagan.

Hozirda qidiruv ishlariga beshta qutqaruv otryadi va suvda harakatlanayotgan yettita qutqaruv brigadasi jalb etilgan. Shuningdek, Sirdaryo va Jizzax viloyatlaridan ham qutqaruv otryadlari jalb qilingan.

Qidiruv ishlari kecha-yu kunduz davom ettirilmoqda. FVV ma’lumotiga ko‘ra, suv omborining chuqurligi va hududning kattaligi qidiruv ishlarini murakkablashtirmoqda.