Shavkat Mirziyoyev 2026-yilda Nyu York yoki Vashington shahrida o‘zbekistonliklar uchun mahalla guzari tashkil etish bo‘yicha topshiriq berdi. Bu haqda davlat rahbarining Tashqi ishlar vazirligi hamda xorijdagi diplomatik vakolatxonalar faoliyatiga bag‘ishlangan yig‘ilishida so‘z bordi.

Qayd etilishicha, prezident AQShdagi vatandoshlar bilan uchrashuvlar chog‘ida mahalla guzari tashkil etish tashabbusini ilgari surgan. Mazkur guzar Nyu York yoki Vashingtonda barpo etilishi rejalashtirilmoqda. Topshiriqni amalga oshirish vazifasi O‘zbekistonning AQShdagi elchisi Furqat Siddiqovga yuklatildi.

“Shu bo‘yicha tadbirkorlardan taklif olib, o‘zimizdan ham sherik qilib, yaxshi loyiha qilinglar. Vatandoshlarimizga bir makon qurib beraylik, bu ularga g‘urur va iftixor bag‘ishlasin”, – dedi Shavkat Mirziyoyev.

​​Ma’lum qilinishicha, ushbu mahalla guzarida O‘zbekiston bayrog‘i o‘rnatiladi. Shuningdek, milliy oshxonalar va choyxonalar tashkil etilishi ham ko‘zda tutilgan. Davlat rahbari ushbu loyiha bo‘yicha aniq va amaliy takliflar ishlab chiqishni topshirdi.

Elchi Furqat Siddiqov o‘z nutqida 2018-yil O‘zbekiston—AQSh munosabatlarida muhim burilish bo‘lganini qayd etdi. Uning aytishicha, Shavkat Mirziyoyev va Donald Tramp o‘rtasidagi muloqot ikki tomonlama aloqalarni tizimli bosqichga olib chiqqan.

“Endi AQSh rahbariyati, Oq uy vakillari va kongressmenlar bilan to‘g‘ridan to‘g‘ri muloqot qilish imkoniyati mavjud. Bu borada barcha eshiklar ochildi. 2026-yilda eksportni diversifikatsiya qilishni rejalashtiryapmiz”, – dedi elchi.

​​Shuningdek, joriy yilda O‘zbekistonda ishlab chiqariladigan 14 turdagi yangi mahsulotni AQSh bozoriga chiqarish rejalashtirilgani ma’lum qilindi. Bundan tashqari, 100 ta to‘qimachilik kompaniyasiga WRAP sertifikatini olib berish ham maqsad qilingan.

• AQSh
• Mahalla
• Prezident
• Shavkat Mirziyoyev