Saudiyaning “Al-Ittihod” klubi ijtimoiy tarmoqdagi sahifasida hujumchi Karim Benzemaning transferini eʼlon qildi.

“Benzema biz bilan. Ittihodga xush kelibsiz”, – deb yozdi “yoʻlbarslar” laqabli klub matbuot xizmati.

Qayd etilishicha, shartnoma 2026-yilgacha moʻljallangan. Insayder Fabrisio Romanoning yozishicha, Benzemaning yillik maoshi tijoriy kelishuvlar evaziga 200 million yevroga yetishi mumkin.

Eslatib oʻtish mumkin, “Al-Ittihod” Ronaldu toʻp tepayotgan “Al-Nasr”ni ortda qoldirib, Saudiya Arabistoni chempioni boʻldi.

Maʼlumot oʻrnida, Karim “qaymoqranglilar” safida 14 mavsum oʻynadi, klubning 647 ta oʻyinida qatnashib, 353 ta gol urdi.

Joriy mavsumda futbolchi 23 ta oʻyinda maydonga tushib, oʻz hisobiga 18 ta gol va 3 ta assist yozdirib qoʻydi.

• Benzema
• Futbol
• Saudiya Arabistoni