“Hududgaz Andijon” gaz ta’minoti filiali, tuman gaz ta’minoti bo‘limi xodimlari, “O‘zenergoinspeksiya” va huquq-tartibot organlari hamkorligida Andijon viloyatining Asaka tumanida o‘tkazilgan reyd jarayonida tabiiy gazdan noqonuniy foydalanish holati fosh etildi. Bu haqda Energetika vazirligi matbuot xizmati xabar berdi.

Asaka tumanining “Amir Temur” MFY hududidagi “V. Y. T.” MChJ binosida tabiiy gazdan foydalanish holati o‘rganilganda, korxona egasi A. D. gaz ta’minoti tashkiloti bilan shartnoma tuzmasdan, rezina shlang orqali o‘zboshimchalik bilan tarmoqqa ulanib, “zangori yoqilg‘i”dan tijorat maqsadida foydalanib kelayotgani aniqlangan.

Holat yuzasidan dalolatnoma tuzilib, 1 milliard 419 million so‘mlik tabiiy gaz hajmlari qayta hisob-kitob qilingan. Shuningdek, jarayonga oid barcha hujjatlar huquqni muhofaza qiluvchi organlarga yuborilgan.

• Andijon
• Energetika_vazirligi
• Gaz
• MCHJ
• Qoidabuzarlik