Bloomberg xabariga ko‘ra, Xitoy hukumati AQShda TikTok bloklanishining oldini olish uchun ijtimoiy tarmoqning Amerikadagi bo‘limini Ilon Maskka sotish imkoniyatini ko‘rib chiqmoqda.

Ushbu kelishuv amalga oshadigan bo‘lsa, TikTok tadbirkorga tegishli X platformasi nazoratiga o‘tishi taxmin qilinmoqda. Xitoy Tramp ma’muriyati bilan tariflar va eksport nazorati masalalarida “murakkab muzokaralar” o‘tkazishi kerak. Agentlikning ta’kidlashicha, TikTok bilan bo‘ladigan kelishuvga “munosabatlarni yaxshilash uchun imkoniyat” sifatida qaralmoqda.

O‘z navbatida TikTok vakili Maskning ijtimoiy tarmoqni sotib olishi haqidagi gaplarni “uydirma” deb atagan.

Ma’lumot uchun, AQShda 19-yanvardan TikTok’ni taqiqlash haqidagi sud qarori kuchga kiradi.

Avvalroq, Oq uyning bo‘lajak egasi Donald Tramp AQSh Oliy sudidan Vashingtondagi yangi ma’muriyat hokimiyat tepasiga kelguniga qadar TikTok taqiqini kechiktirishni so‘ragani haqida xabar berilgan edi.

• AQSh
• Ilon_Mask
• TikTok
• Tramp
• Xitoy
• taqiq