Yevropa Chempionlar Ligasi guruh bosqichi 8-turidan o‘rin olgan barcha uchrashuvlar yakunlandi:

“Arsenal” o‘z maydonida “Qayrat”ni qabul qilib, 3:1 hisobida g‘alaba qozondi. Uchrashuvdagi hisob 3-daqiqada “to‘pchilar” hujumchisi Viktor Gyokeresh tomonidan ochilgan bo‘lsa, 7-daqiqada olmaotaliklar penaltidan hisobni tenglashtirdi. 16-daqiqaga kelib, “Arsenal” yana hisobda oldinga chiqib oldi. Ben Uaytning uzatmasidan keyin Kay Haverts “Qayrat” darvozasiga jamoasining ikkinchi golini kiritdi. 

38-daqiqada oradagi farq yiriklashdi. Gabriyel Martinelli tomonidan kiritilgan gol evaziga “Arsenal” 3:1 hisobida oldinga chiqib oldi. O‘yin yakuniga yaqin “Qayrat” hisobni qisqartirdi. Ammo Rikardinyo tomonidan kiritilgan gol olmaotaliklarga ochko taqdim etmadi.  Natijada Mikel Arteta boshchiligidagi “Arsenal” 8-turda navbatdagi g‘alabani qo‘lga kiritdi. 

Turning markaziy bahsida Portugaliyaning “Benfika”si “Real Madrid”ni qabul qilib, 4:2 hisobida g‘alaba qozondi. 

O‘yindagi hisob 30-daqiqada Kilian Mbappe tomonidan ochildi. Oradan 6 daqiqa o‘tib, tablodagi natija tenglashdi. Norvegiyalik hujumchi Andreas “qirollik klubi” darvozasini ishg‘ol qilib, muvozanatni tikladi. Taym yakuniga yaqin lissabonliklar hisobda oldinga chiqib oldi. Gol muallifi — Vangelis Pavlidis. 

Ikkinchi bo‘limning 54-daqiqasida “Benfika” “Real” darvozasini uchinchi marta ishg‘ol qildi. Andreas o‘zining dublini rasmiylashtirib, tablidagi natijani 3:1 ko‘rinishiga keltirdi. Biroq oradan 4 daqiqa o‘tib, Kilian Mbappe hisobni bittaga qisqartirdi. Ammo 90+8-daqiqada portugallar darvozaboni Anatoli Trubin “Benfika”ning 4-golini kiritib, jamoasiga muhim g‘alabani taqdim etdi.

“Barselona” o‘z maydonida Daniyaning “Kopengagen” klubini qabul qilib, 3:1 hisobida g‘alaba qozondi. Uchrashuvda tezkor gol kiritildi. 4-daqiqada Viktor Dadason gol urib, daniyaliklarni hisobda oldinga olib chiqdi. Ikkinchi bo‘lim boshida Hansi Flik boshchiligidagi jamoa hisobni tenglashtirdi. Robert Levandovski Lamin Yamalning uzatmasidan keyin gol urib, oradagi muvozanatni tikladi. 60-daqiqa Lamin Yamal “Barselona”ning o‘yindagi ikkinchi golini kiritdi. 69-daqiqaga kelib, Rafinya 11-metrlik jarima zarbasini golga aylantirib, oradagi farqni ikkitaga oshirib qo‘ydi. 85-daqiqada zaxiradan maydonga tushgan Markus Reshford hisobni yirik ko‘rinishga keltirib qo‘ydi. 

Mazkur hisob o‘yin yakunga qadar o‘zgarmadi va “Barselona” oxirgi turda muhim g‘alabani qo‘lga kiritdi. 

Shuningdek, 8-tur doirasida “Manchester Siti” o‘z maydonida Turkiyaning “Galatasaroy” klubiga qarshi bahs olib bordi. “Etihad” stadionida o‘tgan uchrashuvda mezbonlar 2:0 hisobida zafar quchdi. O‘yindagi hisob 11-daqiqada Erling Holand tomonidan ochild. 29-daqiqada Rayan Sherki “shaharliklar” ustunligini mustahkamladi. Mazkur natija uchrashuv yakuniga qadar o‘zgarmadi va Pep Gvardiola jamoasi muhim g‘alabani qo‘lga kiritdi.

Natijada “Manchester Siti” 16 ochko bilan 8-pog‘onani egallab, 1/8 final bosqichiga yo‘l oldi. “Galatasaroy” esa 10 ochko bilan 20-o‘rinni band etdi.

Yana bir uchrashuvda “Liverpul” o‘z maydonida Ozarbayjonning “Qorabog‘” klubini qabul qilib, 2:0 hisobida g‘alaba qozondi. Uchrashuvdagi hisob 15-daqiqada Aleksis Makallister tomonidan ochildi. 21-daqiqada esa mersisaydliklar o‘zining ikkinchi golini kiritdi. Ikkinchi bo‘limning boshida “Liverpul” Muhammad Salohning goli evaziga hisobni yirik ko‘rinishga keltirdi. 57-daqiqada esa Ugo Ekitike inglizlarning o‘yindagi to‘rtinchi golini kiritdi. Oradan 5 daqiqa o‘tib, mersisaydliklar beshinchi marta “Qorabog‘” darvozasiga yo‘l topdi. O‘yin yakuniga yaqin Fediriko Kyeza “Liverpul”ning 6-golini kiritib, uchrashuvga yakuniy nuqtani qo‘ydi.

Mazkur hisob o‘yin yakuniga qadar o‘zgarmadi va “Liverpul” Chempionlar Ligasi guruh bosqichining oxirgi turida yirik hisobda g‘alaba qozondi.

YeChL guruh bosqichining so‘nggi turida markaziy o‘yinlaridan yana biri “PSJ” “Nyukasl” ishtirokida bo‘lib o‘tdi. Uchrashuvda hisob 8-daqiqada Vitinya tomonidan ochildi. Birinchi bo‘lim yakuni arafasida mehmonlardan Jo Uillok tablodagi natijani 1:1 ko‘rinishiga keltirib qo‘ydi. O‘yin qizi va tomoshabop o‘tgan bo‘lsa-da hisob boshqa o‘zgarmadi. Yakuniy natija 1:1.

“Napoli” va “Chelsi” o‘rtasidagi bahs ham yakuniga yetdi. Uchrashuv Neapoldagi “Diego Armando Maradona” stadionida bo‘lib o‘tdi va unda mehmonlar 3:2 hisobida g‘alaba qozondi. O‘yinda hisob 19-daqiqada “Chelsi” yarim himoyachisi Enso Fernandes tomonidan ochildi. 33-daqiqada “Napoli” futbolchisi Antonio Vergara muvozanatni tikladi. 43-daqiqada Rasmus Hoylund mezbonlarni oldinga olib chiqdi. Joao Pedro 61-daqiqada hisobni tenglashtirdi, 82-daqiqada esa dubl qayd etib, londonliklarga g‘alaba keltirdi. 8 tur yakuniga ko‘ra, “Napoli” 8 ochko bilan 30-o‘rinda joy oldi. “Chelsi” esa 16 ochko jamg‘arib, 6-pog‘onani egalladi.

Shuningdek, kunning navbatdagi uchrashuvida Dortmundning “Borussiya” klubi o‘z maydonida Italiyaning “Inter” jamoasini qabul qildi. “Signal Iduna Park” stadionida bo‘lib o‘tgan bahsda mehmonlar 2:0 hisobida g‘alaba qozondi. O‘yinda hisob 81-daqiqada Federiko Dimarko tomonidan ochildi. 90+4-daqiqada esa Andi Diuf “Inter”ning ustunligini mustahkamladi.

Mazkur natijadan so‘ng “Inter” 15 ochko jamg‘argan bo‘lsa, “Borussiya” hisobida esa 11 ochko mavjud. Guruh bosqichi yakunlariga ko‘ra, har ikki jamoa ham pley-off bosqich yo‘llanmasiga ega chiqdi.

Yevropa Chempionlar Ligasi 8-turidan o‘rin olgan bahsda Niderlandiyaning “PSV” klubi o‘z maydonida Myunxenning “Bavariya” jamoasini qabul qildi. Eyndxovendagi “Filips” stadionida bo‘lib o‘tgan uchrashuvda mehmonlar 2:1 hisobida g‘alaba qozondi.

“Bavariya” futbolchisi Jamal Musiala 58-daqiqada hisobni ochdi. 78-daqiqada Ismoil Saybari muvozanatni tikladi. 84-daqiqada esa Harri Keyn g‘alaba golini kiritib, “Bavariya”ga muhim uch ochkoni tadqim etdi.

Mazkur natijadan so‘ng “PSV” 8 ochko bilan 28-o‘rinni egallab, musobaqani tark etdi. “Bavariya” esa 21 ochko jamg‘arib, ikkinchi o‘rinni band etdi va 1/8 final yo‘llanmasini qo‘lga kiritgan edi.

Chempionlar ligasi 8-turidan o‘rin olgan navbatdagi uchrashuvda Frankfurtning “Ayntraxt” klubi o‘z maydonida Londonning “Tottenhem” jamoasini qabul qildi. “Frankfurt Arena” stadionida kechgan uchrashuvda mehmonlar 2:0 hisobida g‘alaba qozondi. Uchrashuvdagi hisob 47-daqiqada Randal Kolo Muani tomonidan ochildi. 77-daqiqada Dominik Solanke londonliklar ustunligini ikki barobarga oshirdi.

Mazkur bahsdan so‘ng “Ayntraxt” 4 ochko bilan 33-o‘rinni egallab, musobaqani tark etdi. “Tottenhem” esa 17 ochko jamg‘arib, 1/8 final yo‘llanmasini qo‘lga kiritdi.

• Barselona
• Chempionlar Ligasi
• Liverpul
• Manchester Siti
• Real