Zo‘rlash jinoyatini sodir etgani uchun Interpol orqali xalqaro qidiruvda bo‘lgan fuqaro Polshadan O‘zbekistonga ekstraditsiya qilindi.

U Polsha hududida qo‘lga olingach va zarur tartib talablari amalga oshirilgach, keyinchalik jinoiy javobgarlikka tortish maqsadida Interpolning O‘zbekiston Respublikasidagi Milliy Markaziy Byurosi xodimlariga topshirilgan. Bu haqda O‘zbekiston Respublikasidagi Interpolning Milliy markaziy byurosi xabar berdi.

Shu bilan birga, turli ommaviy axborot vositalarida xabar qilinganidek, Amerika Qo‘shma Shtatlaridan O‘zbekiston Respublikasiga noqonuniy migratsiyaga qarshi kurashish tadbirlari doirasida mamlakatda noqonuniy ravishda bo‘lgan 39 nafar fuqaro deportatsiya qilindi. Ular orasida Interpol kanallari orqali o‘ta yirik miqdordagi firibgarlik uchun qidiruvda bo‘lgan jinoyatchilar ham bo‘lgan.

Bu AQShning O‘zbekistondagi elchixonasi va Interpolning O‘zbekiston Respublikasidagi Milliy markaziy byurosi o‘rtasida doimiy axborot almashinuvi va yaqin hamkorlik asosida AQSh immigratsiya xizmatlari e’tiboriga tushgan xalqaro qidiruvdagi jinoyatchilarning ikkinchi marotaba qo‘lga olinishi hisoblanadi.

Jinoyatchilar Islom Karimov nomidagi Toshkent xalqaro aeroportiga yetib kelgach, huquqni muhofaza qiluvchi organlarga yetkazish va sodir etilgan jinoyatlar uchun javobgarlikka tortish uchun Interpol Milliy markaziy byurosi va Respublika Ichki ishlar organlari xodimlari tomonidan kutib olingan.

• Ekstraditsiya
• Interpol
• Jinoyat
• Polsha
• fuqaro