Афғонистонда аёллар ҳуқуқларини кескин чекловчи янги Жиноят кодекси расман қабул қилинди. Мутахассисларнинг таъкидлашича, кодексдаги бир қатор нормалар амалда оиладаги зўравонликни қонунийлаштиради ҳамда аёллар ва болаларнинг асосий ҳуқуқларини жиддий даражада чеклайди. Аёлга етказилган тан жароҳатлари учун белгиланган жазо айрим зўравонлик билан боғлиқ бўлмаган ҳуқуқбузарликларга қараганда бир неча баравар енгил бўлиши мумкин.

Турмуш ўртоғига нисбатан зўравонлик масаласига бағишланган 32-модда жамоатчиликнинг кескин норозилигини келтириб чиқарган. Унга кўра, эр хотинини куч билан калтаклаб, суяк синишлари, жароҳатлар ёки кўкаришлар етказган тақдирда ҳам, аёл бу ҳолатни судда исботлай олса, эркак 15 суткалик қамоқ жазоси билан жазоланиши мумкин.

Мазкур кодекс шахс ҳуқуқларидан устун қўйилган ижтимоий назорат, патриархал тузум ва мафкуравий босимни мустаҳкамлайди. Ҳужжат аёлларга номутаносиб тарзда таъсир кўрсатиб, уларнинг ҳаракатланишини, муносабатларини, оилавий қарорлар қабул қилишини ва шахсий эътиқодларини қатъий тартибга солади, зўравонликдан эса жуда чекланган ҳимоя чораларини таклиф қилади.

Шунингдек, динидан воз кечганлар учун ниҳоятда шафқатсиз жазолар белгиланган. 58-моддага мувофиқ, исломдан воз кечган аёллар умрбод қамоқ жазосига ҳукм қилиниши ва тавба қилиб, яна исломга қайтмагунча ҳар уч кунда 10 мартадан қамчи билан урилиши мумкин. Эркакларга эса бошқача ёндашув қўлланилади. Уларга уч кунгача тавба қилиш имконияти берилади, шундан сўнггина қатл этилиш эҳтимоли кўриб чиқилади.

• Афғонистон
• Аёллар
• Жиноят
• Кодекс