ФИФА президенти Жанни Инфантино Россия клублари ва терма жамоаларининг халқаро мусобақаларда иштирок этишига қўйилган тақиқни бекор қилиш масаласини кўриб чиқиш лозимлигини билдирди. У бу ҳақда Британиянинг Sky телеканалига берган интервьюсида маълум қилди.

“Россия жамоаларига нисбатан санкцияларни бекор қилиш масаласини кўриб чиқиш керакми? Албатта, буни қилишимиз шарт. Ҳеч бўлмаганда ёшлар даражасида. Чунки бу тақиқ ҳеч қандай фойда бермади, аксинча, янада кўпроқ норозилик ва нафратни келтириб чиқарди”, – деган Инфантино.

Шунингдек, ФИФА раҳбари ташкилот қоидаларига ўзгартириш киритиш ва миллий жамоаларнинг сиёсий сабабларга кўра футбол ўйнашдан четлатилишига йўл қўймаслик бўйича аниқ норма белгиланиши зарурлигини таъкидлаган.

Маълумот учун, УEФА ва ФИФА томонидан Россия футбол иттифоқига нисбатан санкциялар 2022 йилнинг февраль–март ойларида жорий этилган. Ушбу санкциялар Россиянинг Украинага қарши ҳарбий юришлари сабаб кучга кирган. Қаторасига тўрт мавсумдан буён Россия Премер Лигаси вакиллари Еврокубокларда иштирок этмаяпти. Валерий Карпин бошчилигидаги миллий терма жамоа эса фақат ўртоқлик учрашувлари ўтказмоқда.

• FIFA
• Жанни Инфантино
• Россия
• УЕФА
• тақиқ