“HoiINDI” тахаллуси остидаги дизайнер “Huawei P60 Pro” ҳали эълон қилинмаган флагман смартфонининг тахминий кўриниши акс этган юқори сифатли рендерларни интернетга жойлади. Илгари тармоқда қурилманинг орқа томони тасвирлари пайдо бўлган эди, эндиликда эса бўлажак фойдаланувчиларга олд панель кўрсатилди.

Кўрсатилган тасвирлар ҳамда видеолар миш-мишлар ва сиздирилган маълумотларга асосланган. Таъкидланишича, келгуси “Huawei P60” ва “P60 Pro”нинг ҳақиқий дизайни бундай кўринишга эга бўлмаслиги мумкин. Айтганча, “Huawei”нинг ўзи ҳам P-сериясидаги янги қурилмаларнинг чиқарилиши ҳақида ҳеч қандай расмий маълумот эълон қилгани йўқ.

Тахминларга кўра, “Huawei P60 Pro”нинг бурчаклари қийшиқ экранга эга бўлади, марказда селфи камераси, орқа томонда эса жуда кўп камералар, жумладан, телескопик линзали модул жойлашади. Оддий “Huawei P60”текис экран ва оддийроқ камералар тўпламига эга бўлиши кутилмоқда.

Миш-мишларга кўра, “Huawei P60 Pro” 120 Гц янгиланиш тезлигига эга 6,6 дюймли QHD+ OLED экран, 5 G’сиз “Снапдрагон 8 Ген 2” ёки “Снапдрагон 8+ Ген 1” процессори ҳамда 100 ватт симли ва 500 ватт симсиз зарядлаш қувватига эга 5000 мА/соат батарея билан жиҳозланади. Шунингдек, у 50 мегапикселли асосий, 50 мегапикселли ультра кенг ва 64 мегапикселли телекамерага эга. Шунингдек, IP68 стандарти бўйича сувни муҳофаза қилиш ҳақида маълумот мавжуд.

“Huawei” компаниясининг янги флагманлари тақдимоти жорий йилнинг март ойида бўлиб ўтиши кутилмоқда. Смартфоннинг нархи эса 1150 АҚШ доллари миқдорида бўлиши кутилмоқда.

Аввалроқ, “Huawei” янги бизнес йўналишларини яратишга мажбурлиги маълум қилинган эди. Шунингдек, компаниянинг 300 миллионга яқин қурилмалари учун фойдаланиладиган ўзининг “Harmony” операцион тизимини чиқарди.

Бундан ташқари компаниянинг 2022 йил биринчи ярмидаги соф фойдаси 52 фоизга камайган эди. Ушбу кўрсаткичларга мураккаб иқтисодий вазият таъсир кўрсатган, бу эса ишлаб чиқарувчининг товарларига бўлган талабнинг қисқаришига олиб келди. Натижада АҚШ санкциялари остида қолган “Huawei” компаниясининг аҳволи янада оғирлашди.

• Huawei
• Taqdimot
• Хитой