Қирғизистон президенти Садир Жапаров ғалаба кунини нишонлашга бағишланган тадбирларда иштирок этиш учун Москвага ташриф буюрадиган ягона хорижий давлат раҳбари бўлади. Бу ҳақда “Ведомости” нашри президент маъмуриятидаги дипломатик манбага таяниб хабар берди.

Қайд этилишича, Садир Жапаров 31 март куни ҳукуматдаги халқаро муносабатларни назорат қилувчи бош вазир ўринбосари Алексей Оверчукдан Россияга ташриф буюриш таклифини олган. Қирғизистон раҳбарининг расмий ташрифи 8-9 май кунларига мўлжалланган.

“Албатта, биз Қирғизистон ушбу ғалабага ва Москвани ҳимоя қилишга қандай ҳисса қўшганини доим эслаймиз, бу биз учун муқаддасдир”, – деди Оверчук ташриф ҳақида эълон қилар экан.

“Ведомости” хабарига кўра, ташриф давомида Қирғизистон президенти тантанали тадбирларда ва олий даражадаги музокараларда иштирок этади. Россия президенти матбуот котиби Дмитрий Песков газетанинг бошқа хорижий давлатлар раҳбарларининг байрамга Москвага келиши мумкинлиги ҳақидаги сўровига жавоб бермади.

Қирғизистонлик сиёсатшунос ва Марказий Осиё бўйича эксперт Марс Сариевнинг айтишича, Москва Қирғизистонни “Марказий Осиё учун кураш” фонида “ишончли ҳамкор” сифатида кўради. Сариевнинг қайд этишича, жорий йил 23 апрель куни АҚШнинг собиқ элчиси, ҳозирда Давлат котибининг Жанубий ва Марказий Осиё бўйича ёрдамчиси Доналд Лу Бишкекка келишига сабаб, ғарб расмийлари “Марказий Осиё давлатларини ўз томонига тортишга ҳаракат қилаётганидир”.

“Аммо Қирғизистон ҳозир Россия билан сиёсий ва иқтисодий жиҳатдан чамбарчас боғланган. Москва танқисликни ёпиш учун мамлакатга электр энергияси етказиб беришга рози бўлди. Давлатларимиз ҳаво ҳужумидан мудофаа соҳасида яқиндан ҳамкорлик қилмоқда. Қирғизистон Россиянинг минтақадаги ишончли форпостларидан бири, менимча, Қирғизистон президентининг Москвага бўлажак ташрифи ҳам шу сабаб бўлди”, – дейди Сариев.

Маълумот учун, 2022 йилда Украинада ҳарбий ҳаракатлар бошланганидан 2,5 ой ўтгач бўлиб ўтган ғалаба кунини нишонлаш учун бирорта ҳам хорижий давлат раҳбари Москвага келмади. Кремл бунга муносабат билдириб чет эл раҳбарларини таклиф қилмаганини айтганди.

“Бу юбилей санаси эмас. Бу бизнинг байрамимиз, бу бутун Россия учун, барча руслар учун муқаддас байрамдир ”, – деди ўша пайтда Россия Федерацияси Президентининг матбуот котиби Дмитрий Песков.

• 9 май
• Қирғизистон
• Россия