NASA сўнгги 30 йил давомида сунъий йўлдош маълумотларини таҳлил қилиб, денгиз сатҳи 1993-йилдан бери тўққиз сантиметрдан кўпроққа кўтарилганини аниқлади.

Таъкидланишича, сўнгги ўттиз йилликда океан сатҳи 9,1 сантиметрга кўтарилган, яъни сувнинг кўтарилиш тезлиги йилига қарийб 0,3 сантиметрни ташкил этган.

Олимлар келажакда бу жараён тезлашишини ва 2050 йилга бориб океан йилига 0,66 сантиметрга кўтарилишини тахмин қилмоқда.

Океанлардаги сув глобал исиш туфайли эриётган қутб музликлари ҳисобига кўтарилмоқда. Океанлардаги ортиқча сувнинг асосий манбаи Гренландия муз қатлами бўлиб, олимларнинг фикрича, у қайтиб келмайдиган нуқтага яқинлашмоқда.

Мутахассисларнинг таъкидлашича, жорий асрнинг ўрталарига келиб АҚШ қирғоқларидаги сув тахминан 30 сантиметрга кўтарилади, дунёнинг бошқа ҳудудларида эса вазият бундан ҳам ёмонроқ бўлиши мумкин.

Тахминларга кўра, дунё бўйлаб 800 миллионга яқин одам мажбурий кўчирилишдан азият чекиши мумкин.

Аввалроқ олимлар АҚШ сув тошқини оқибатида оммавий миграцияга дуч келишини айтишган эди.

• Global
• Okean
• dengiz
• қизиқарли