2025-yilda Sog‘liqni saqlash, Maktabgacha va maktab ta’limi vazirliklari hamda mahalliy hokimliklarda eng ko‘p korrupsion jinoyatlar sodir etilgan. Bu haqda 6-fevral kuni Toshkentda o‘tgan matbuot anjumanida Korrupsiyaga qarshi kurashish agentligi rahbari Akmal Burxanov ma’lum qildi, – deya xabar bermoqda Gazeta.

Manbaga ko‘ra, 2024-yilda 5716 ta korrupsion jinoyat aniqlangan bo‘lsa, bu 2025-yilda 5222 tani tashkil etgan va 8,6 foizga kamayish tendensiyasi kuzatilgan.

2025-yilda hududlar kesimida korrupsion jinoyatlar Farg‘ona va Surxondaryo viloyatlarida ortgan, Xorazm, Qashqadaryo, Toshkent va Samarqand viloyatlarida esa kamaygan.

“12 nafar tuman va shahar darajasidagi hokimlar korrupsiya sababli javobgarlikka tortildi. Bunday jinoyatlarning 300 dan ortig‘i mahalliy hokimliklarga to‘g‘ri keladi. Ularning ham aksariyati, ya’ni 80 foizdan ziyodi hokim yordamchilari bilan bog‘liq. Biz buni o‘rganib, tahlil qildik. Bu yerda juda ham ko‘p korrupsiyaviy omillar bo‘lgani uchun ularda mana shu jinoyatlar ko‘p sodir etilgan”, — deydi Akmal Burxanov.

“Biz hozirgi kunda subsidiya va imtiyozli kreditlarni inson omilisiz, ya’ni hokim yordamchisi va “mahalla yettiligi”ga bog‘liq bo‘lmagan holda ajratish va inson omilisiz raqamlashtirish choralarini ko‘rdik. O‘ylaymanki, 2026-yilda hokim yordamchilari tomonidan sodir etiladigan korrupsiyaviy jinoyatlar salmog‘i keskin kamayishiga erishiladi”, — deya qo‘shimcha qildi Antikorrupsiya agentligi rahbari.

Uning so‘zlariga ko‘ra, o‘tgan yili hokimliklar kesimida eng ko‘p korrupsiyaviy jinoyatlar Toshkent shahri (612 ta), Toshkent (584 ta) va Farg‘ona (455 ta) viloyatlarida sodir etilgan.

• Jinoyat
• Korrupsiya
• hokim