Yunonistonning poytaxti Afinada Isroilning G‘azoga uyushtirgan hujumlariga norozilik bildirish va Falastin xalqi bilan birdamlikni ifodalash maqsadida Falastinni qo‘llab-quvvatlash namoyishi o‘tkazildi.

Anadolu agentligining yozishicha, Yunoniston parlamentidagi Gretsiya Kommunistik partiyasiga (KKE) aloqador Ishchilar kasaba uyushmasi PAME chaqirgan norozilik namoyishi uchun ishchilar, davlat xizmatchilari, pensionerlar va talabalar Sintagma maydonidagi parlament binosi oldida to‘plandi.

Kasaba uyushmalari vakillarining chiqishlari bilan boshlangan namoyishda Isroilning G‘azoga hujumlarini zudlik bilan to‘xtatish talab qilingan.

Parlament oldida G‘azoda halok bo‘lgan bolalar va go‘daklarning oq kafanga o‘ralgan maketlari qo‘yilgan. G‘azodagi tinch aholi o‘limini ta’kidlash uchun olomon orasidan maket tobut ham olib o‘tilgan.

Faollar Falastinga ozodlik chaqiruvchi shiorlar aytishdi. Boshqa bir namoyishchi: “Bugun G‘azoda sodir bo‘layotgan voqealarni tushunib bo‘lmaydi.

Bolalar o‘lmoqda. Odamlar faqat bir kosa ovqat olish uchun u yoq-bu yoqqa yugurishadi. Bizning zamonda bunday narsalar bo‘lishi mumkin emas. Ularni to‘xtatish kerak”, – dedi.

PAME chaqirig‘i bilan bugun Gretsiyaning 40 dan ortiq shaharlarida, xususan Afina va Salonikida Falastinni qo‘llab-quvvatlash uchun namoyishlar o‘tkazilgani ma’lum qilindi.

• Falastin
• Gretsiya
• Isroil
• Namoyish