Birlashgan Arab Amirliklaridan Interpol kanallari orqali qidiruvda bo‘lgan fuqarolar O‘zbekiston Respublikasiga olib kelindi.

Toshkent va Abu-Dabi Interpol Milliy Markaziy Byurolari xodimlarining yaqin hamkorligi va muvofiqlashtirishi natijasida, og‘ir jinoyatlar sodir etganlik aybi bilan xalqaro qidiruvda bo‘lgan uch nafar fuqaro Birlashgan Arab Amirliklaridan O‘zbekiston Respublikasiga topshirilgan. Bu haqda IIV xabar berdi.

“Milliy markaziy byurolar o‘rtasidagi uchrashuvlar va muzokaralar davomida shakllangan ikki tomonlama aloqalar, transmilliy jinoyatchilikka qarshi kurashga yo‘naltirilgan barcha jihatlarni hisobga olgan holda amaldagi xalqaro bitimlarga asoslangan tarzda jinoyatchilarni topshirish ko‘rsatkichlarining o‘sishi kuzatilmoqda”, – deyiladi xabarda.

Olib kelingan shaxslar O‘zbekiston huquqni muhofaza qilish organlari tomonidan mamlakat hududida sodir etilgan iqtisodiy va mulkiy jinoyatlarga oid ayblovlar bo‘yicha qidiruvda bo‘lgan. Endilikda ular jinoiy javobgarlikka tortiladi.

• BAA
• IIV
• Interpol