Surxondaryo viloyati Qumqo‘rg‘on tumanida suv taqchilligi yuqori bo‘lishiga qaramasdan, turizm sohasini rivojlantirish maqsadida yangi loyiha amalga oshirilmoqda. “O‘zA” xabariga ko‘ra, “Janubiy Surxon” suv ombori hududida ekoturizm majmuasi qurilishi uchun 15,7 gektar yer ajratilgan.

Loyiha qiymati 140 mlrd so‘mga teng bo‘lib, unda tabiiy muhitni muhofaza qilish masalasiga katta e’tibor qaratilmoqda. Mutasaddilarning ma’lumoticha, qurilish jarayonida atrof-muhitni avaylash, yashil maydonlar yaratish, ekologik talablarga javob beruvchi yo‘l va infratuzilmalar barpo etish, shuningdek, oqova suvlarni tozalash tizimini joriy etish ko‘zda tutilgan.

Yangi maskanda kottej uylar, basseyn, avtoturargoh va avtomobil yuvish shoxobchalari quriladi. Shuningdek, savdo va ovqatlanish nuqtalari, suv usti ayvonlari, sport va bolalar maydonchalari hamda piyodalar yo‘laklari tashkil etilishi rejalashtirilgan. Loyiha doirasida baliqchilik faoliyati yo‘lga qo‘yilishi ham nazarda tutilmoqda.

Ma’lumot uchun, “Janubiy Surxon” suv ombori 58 yil avval ishga tushirilgan bo‘lib, dengiz sathidan 408 metr balandlikda joylashgan. Uning to‘la suv sig‘imi 800 million kub metrni tashkil etadi.

• Surxondaryo
• Suv ombori
• Turizm