Respublika va 14 ta hududiy suv ta’minoti korxonalarida yagona situatsion markaz tashkil etish orqali avariyalarni tezkor bartaraf qilish tizimi joriy etiladi. Bu haqda 28-fevral kuni prezident Shavkat Mirziyoyev tomonidan imzolangan qarorda belgilandi.

“Osiyo taraqqiyot banki ishtirokida “Iqlim texnologiyalari orqali suv resurslarini boshqarishni rivojlantirish” loyihasini amalga oshirish chora-tadbirlari to‘g‘risida”gi qarorga ko‘ra, yirik suv inshootlari va magistral quvurlarga 4,8 mingta hisoblagichlarni hamda 2,8 mingta telemetriya tizimlarini o‘rnatish hisobiga ishlab chiqarilgan ichimlik suvining aniq hisobi yuritiladi. 12,7 mingta suv inshootlari hamda 80 ming kilometr ichimlik va oqova suv tarmoqlarining raqamli xaritasini (GIS) joriy etish orqali infratuzilmani yangilash ishlari samaradorligini oshiriladi.

Shuningdek, 5,1 million iste’molchini qamrab olgan billing tizimini takomillashtirish, suv ta’minoti korxonalari moliyaviy hisobotining xalqaro standartlariga o‘tish va konsolidatsiyalashgan hisob-kitobini yuritish ham ko‘zda tutilgan.

O‘zbekistondagi barcha ichimlik suvi ta’minoti korxonalarida sifat monitoringini yuritish va ma’lumotlarni boshqarish markazlarini yaratish rejalashtirilgan. 2025-yil yanvar oyi holatiga ko‘ra, O‘zbekiston aholisining 80,9 foizi markazlashgan ichimlik suvi bilan ta’minlangan. So‘nggi 6 yilda aholining ichimlik suvi ta’minotini yaxshilashga 10 trillion so‘mga yaqin mablag‘ yo‘naltirildi. Ushbu mablag‘lar hisobidan 1 176 ta suv inshooti va 20,8 ming kilometr ichimlik suvi tarmoqlari tortildi.

O‘zbekistonda 2026-yilda markazlashgan ichimlik suvi bilan ta’minlanganlik 90 foizga, oqova suv xizmati bilan qamrab olinganlik darajasi 35 foizga yetkaziladi.

• Prezident
• Qaror
• Shavkat Mirziyoyev
• Suv ta’minoti
• korxona