Qozog‘iston parlamentida jamoat joylarida diniy libos kiyishni taqiqlash masalasi ko‘rib chiqilishi mumkin. Bu haqda parlament deputati Ermurat Bapi ma’lum qildi, deb xabar beradi “Tengrinews.kz”.

Deputatning so‘zlariga ko‘ra, jamiyatda diniy libos kiyishni taqiqlash masalasi dolzarb bo‘lib qolgan.

“Ayni paytda biz uchun eng muhim masala mamlakatimiz milliy manfaatlarini, milliy an’analarni, milliy madaniyatni saqlab qolish hisoblanadi. Agar hozirgi vaziyatga nazar soladigan bo‘lsak, jamiyatimizda qora kiyingan qozoqlar ko‘paydi. Bu vaziyat bizning kelajakdagi milliy manfaatlarimizga jiddiy xavf soladi”, — dedi Yermurat Bapi.

Deputat ta’kidlaganidek, tegishli qonun loyihasi parlamentning bo‘lajak sessiyasiga kiritiladi. “Shuning uchun biz, bir guruh deputatlar, parlamentning kuzgi sessiyasida shunday qonun loyihasini tayyorladik, menimcha, u qabul qilingandan so‘ng jamiyatdagi hijob, niqob va boshqa diniy liboslar masalasi hal bo‘ladi. O‘shanda biz, ehtimol, qandaydir qilib diniy kiyim masalasini tartibga sola olamiz”, — deya xulosa qildi u.

• Qozog‘iston
• hijob