AQSh prezidenti Donald Tramp 7-iyul kuni Anqarada bo‘lib o‘tayotgan NATO sammiti doirasida Turkiya prezidenti Rajab Toyyib Erdo‘g‘an bilan uchrashuvi arafasida AQSH 2020-yilda Turkiyaga nisbatan joriy etilgan CAATSA sanksiyalarini bekor qilishini ma’lum qildi. Shuningdek, u Anqaraga F-35 qiruvchi samolyotlarini sotish imkoniyati ham ko‘rib chiqilayotganini bildirdi. Tramp NATO sammitida ishtirok etish uchun Anqaraga yetib keldi. Aeroportda uni shaxsan Prezident Rajab Toyyib Erdo‘g‘an kutib oldi. AQSh prezidenti faxriy qorovulga turk tilida «Merhaba asker!» deya murojaat qildi.

Kutib olish marosimida AQShning Turkiyadagi elchisi Tom Barrak, NATOdagi doimiy vakil Mett Uitaker hamda Qurolli kuchlar shtab boshliqlari qo‘mitasi raisi general Den Keyn ham ishtirok etdi. Mazkur tashrif AQSH prezidentining so‘nggi 11 yil ichida Turkiyaga amalga oshirgan ilk rasmiy tashrifi bo‘ldi. F-35 masalasi ham kun tartibida «Biz sanksiyalarni bekor qilamiz», — dedi Tramp. Uning ta’kidlashicha, bu boradagi ishlarni AQSh Davlat kotibi va Moliya vaziri olib bormoqda. Shuningdek, Tramp Turkiyani AQShning sodiq ittifoqchisi deb atab, Anqaraga F-35 qiruvchi samolyotlarini sotish imkoniyati ko‘rib chiqilayotganini ma’lum qildi. Biroq amaldagi qonunchilik va yuridik cheklovlar sabab bu jarayon qanday amalga oshirilishi hozircha ochiqlanmadi.

AQSh qonunchiligiga ko‘ra, Turkiya Rossiyaning S-400 havo mudofaa tizimlariga egalik qilayotgan ekan, unga F-35 samolyotlarini sotishga ruxsat berilmaydi. Vashington ushbu tizimni F-35 dasturi xavfsizligiga tahdid sifatida baholaydi. Ma’lumotlarga ko‘ra, so‘nggi haftalarda S-400 majmualarini uchinchi davlatga topshirish varianti muhokama qilinmoqda. Biroq bu masala hali yakuniy kelishuv bosqichiga yetmagan va Rossiyaning pozitsiyasi ham noma’lumligicha qolmoqda. Eslatib o‘tamiz, AQSH 2020-yilda Turkiyaning Rossiyadan S-400 zenit-raketa majmualarini xarid qilgani sabab Anqaraga nisbatan CAATSA sanksiyalarini joriy etgan va uni F-35 dasturidan chiqarib yuborgan edi.