Manchesterning sobiq meri Endi Byornem Buyuk Britaniyadagi hukmron Leyboristlar partiyasining yangi rahbari etib saylandi. Partiya parlamentdagi ko‘pchilikka ega bo‘lgani sababli u 20-iyul kuni Kir Starmer o‘rnini egallab, mamlakat bosh vaziri lavozimiga kirishishi kutilmoqda.

Byornemning saylangani 17-iyul kuni Londonda o‘tkazilgan Leyboristlar partiyasining maxsus konferensiyasida e’lon qilindi. Uni 379 nafar leyborist deputat hamda partiya bilan bog‘liq 23 ta tashkilot qo‘llab-quvvatladi. Boshqa nomzod bo‘lmagani bois u partiya rahbari etib tasdiqlandi.

1970-yilda Liverpul yaqinidagi Eyntri shahrida tug‘ilgan Endi Byornem Leyboristlar partiyasining tajribali siyosatchilaridan biri hisoblanadi. U avval Buyuk Britaniya sog‘liqni saqlash hamda madaniyat, ommaviy axborot vositalari va sport vaziri lavozimlarida faoliyat yuritgan. 2017-yildan buyon Buyuk Manchester meri sifatida ishlab, jamoat transporti, uy-joy va ijtimoiy himoya sohalaridagi tashabbuslari bilan tanilgan. COVID-19 pandemiyasi davrida markaziy hukumatga nisbatan qat’iy pozitsiyasi tufayli matbuotda “Shimol qiroli” nomi bilan tilga olingan.

Byornem 2010 va 2015-yillarda ham Leyboristlar partiyasi rahbarligi uchun kurashgan, biroq g‘alaba qozona olmagan. Keyinchalik Buyuk Manchester meri sifatida siyosiy nufuzini mustahkamlab, 2026-yilda parlamentga qaytdi.

Dastlabki nutqida u partiyadagi ichki kelishmovchiliklarga barham berish, hududlarga ko‘proq vakolat berish hamda siyosatni aholining kundalik muammolarini hal etishga yo‘naltirishga va’da berdi.

“Mamlakat yangi siyosatga muhtoj. Siyosiy ochko to‘plashga emas, muammolarni hal qilishga e’tibor qaratishimiz kerak”, — dedi Byornem.

Shuningdek, u Kir Starmerga minnatdorlik bildirib, uning rahbarligida Leyboristlar partiyasi 2024-yilgi parlament saylovida g‘alaba qozonib, 14 yillik konservatorlar hokimiyatiga yakun yasaganini ta’kidladi.