Италия Фаластинни давлат сифатида тан олиш учун иккита шарт қўйди. Мамлакат бош вазири Жоржа Мелони тегишли БМТ Бош Ассамблеяси доирасидаги мулоқот чоғида тегишли шартларни илгари сурди.

Шартларга кўра, барча исроиллик гаровдагилар озод қилиниши ва АҚШ, Евроиттифоқ томонидан террорчи деб тан олинган ХАМАС вакиллари ҳокимиятдан четлаштирилиши керак. Мелони сиёсий босимни асосан ХАМАСга қаратишга чақирмоқда. Бош вазири урушни “айнан шу гуруҳ” бошлагани ва гаровдагиларни озод қилишдан бош тортиб, унинг тугашига “тўсқинлик қилаётгани”ни айтди.

Бугунги кунда БМТга аъзо 193 давлатдан 150 дан ортиғи Фаластинни давлат сифатида тан олган. 80-сессия арафасида Буюк Британия, Австралия, Канада, Португалия, Франция, Белгия, Монако, Малта ва Люксембург ҳам ўз навбатида бундай қарорни эълон қилди.

АҚШ эса, Исроил сингари, Фаластинни тан олишга кескин қарши. Президенти Доналд Трамп бундай қарорни “ХАМАСни мукофотлаш” деб билади.

“Афсуски, ХАМАС тинчлик йўлидаги оқилона таклифларни бир неча марта рад қилди. Энди эса БМТнинг айрим аъзолари Фаластинни мустақил давлат сифатида тан олмоқда. Бу урушни рағбатлантириш сифатида баҳоланади. Фаластинни тан олиш ХАМАС учун катта мукофот бўлади. Бу 7 октябрь воқеалари жумладан, уларнинг даҳшатли жиноятлари учун мукофот бўлган бўларди”, – деган АҚШ етакчиси.

Худди шундай фикрни илгарироқ Исроил бош вазири Бинямин Нетаняху ҳам билдирган эди. БМТ Бош Ассамблеяси 12 сентябрь куни Фаластин-Исроил муносабатларини тартибга солишда “икки халқ учун икки давлат” тамойилига қайтиш чақириғи билан резолюция қабул қилди.

Франция ва Саудия Арабистони томонидан тақдим этилган ушбу ҳужжат лойиҳасини Германия қатори 142 та давлат қўллаб-қувватлади, АҚШ ва Исроил билан бирга ўнта давлат қарши овоз берди. БМТга аъзо 12 та мамлакат бетараф қолди.

• Фаластин
• Италия
• Jorjo Meloni