Европа Чемпионлар лигаси биринчи яримфинал жавоб ўйини доирасида “Интер” ўз уйида “Барселона” билан экстра таймларгача ўйнаб, 2024-2025 йилги мавсум финалига йўлланмани қўлга киритди.

Ўйин қизғин ва муросасиз курашларга бой тарзда бошланди, учрашувнинг 21-дақиқасида Мартинес мезбонларни ҳисобда олдинга олиб чиқди.

Биринчи таймга қўшиб берилган дастлабки дақиқада Чалханўғлу белгиланган пенальтини голга айлантирди. Ҳисоб 2:0 мезбонлар фойдасига.

Иккинчи тайм бошида Эрик Гарсия ҳисобни қисқартирди. Голдан руҳланган каталонияликлар 60-дақиқада Дани Олмонинг бош билан киритган ажойиб голидан кейин ҳисобни тенглаштирди – 2:2.

Ўйиннинг 87-дақиқасига келиб, Рафиня “Барселона”ни ҳисобда олдинга олиб чиқди.

Асосий вақтга қўшиб берилган дақиқаларнинг сўнггисида Ачерби ўзининг Еврокубоклардаги дебют голини уриб, жамоасини муқаррар мағлубиятдан қутқариб қолди. Ҳисоб эса 3:3, навбат қўшимча бўлимларга.

Экстра-таймларнинг биринчисида гол ургач ҳимояланиб хато қилган ва бундан хулоса қилган миланликлар олдинга ўтди. 98-дақиқада захирадан ўйинга қўшилган Фратеззи жамоасининг комбинациясини чиройли якунлаб, “Интер”ни яна ҳисобда олдинга олиб чиқди. Қўшимча бўлимнинг иккинчисида каталонияликларда бир қанча вазиятлар бўлса-да, якунда ҳисоб ўзгармади. Италия жамоаси 4:3 ҳисобида ғалаба қозонди ва сўнгги 3 йилда 2-марта ЕЧЛ финалига йўлланма олди.

Маълумот учун, бугун финалнинг иккинчи йўлланмаси учун баҳсда ПСЖ ўз уйида “Арсенал”ни қабул қилади. Ушбу баҳс Тошкент вақти билан 23:59 да старт олади.

• Барселона
• Футбол
• Интер
• ЕЧЛ