Dunyoning eng boy oshpazlaridan biri Burak O‘zdemir 1994 yil 24 martda Turkiyaning Yayladag‘i shahrida tug‘ilgan. CZN’ Burak Ozdemirning taxallusi bo‘lib, otasining Lalelidagi to‘qimachilik do‘konining nomi – Cinzano so‘zining noto‘g‘ri talaffuz qilinishidan kelib chiqqan.

Istanbullik 28 yoshli oshpaz Burak O‘zdemir o‘zining samimiy tabassumi, shuningdek, tayyorlagan ajoyib taomlari bilan butun dunyoga mashhur bo‘ldi. Asosiy e’tibor yegulik ta’mining mukammalligida emas, balki uning o‘lchamidadir.

Dastlab Burak ovqat pishirish haqida umuman o‘ylamasdi. Aksariyat o‘g‘il bolalar singari u ham futbol o‘ynashni yaxshi ko‘rar, mashhur futbolchi bo‘lishni orzu qilar edi. Biroq 13 yoshida oiladagi og‘ir moddiy ahvol tufayli ishlashga majbur bo‘ladi.

Ota-onasining o‘z restorani bor edi. Aynan o‘sha yerda yosh yigitcha qo‘shimcha pul ishlay boshladi va oshpazlik tajribasiga ega bo‘ldi. Ammo mazali palovi va mashhur kabobi tufayli Ozdemirda milliy turk oshxonasiga muhabbatni o‘zining kichik qassobxonasi bo‘lgan bobosi va buvisi singdirgan.

2009 yilda otasi Burakni Istanbulning Aksaray chekkasiga yubordi, u yerda 16 yoshli bolaning yelkasiga katta mas’uliyat yuklandi: unga oilaviy biznesning yangi filialini ochish vazifasi topshirildi.

Ozdemir boshida unga deyarli hech kim ishonmaganini shunday eslaydi:

“Bu yerni otam ochgan, menga boshqara olmasligimni aytishdi. Lekin bu mening uyim edi, shunchaki biznes emas. Keyin oshpazdan tortib ofisiantgacha har bir xodimga bu yer meniki emas, bizniki, dedim. Buning sharofati bilan muvaffaqiyatga erishdik. Otamdan o‘rnak olib, uning izidan bordim”.

Yosh oshpaz boshchiligidagi oilaviy restoran mashhur edi, lekin boshqa ko‘plab muassasalardan unchalik farq qilmadi. Keyin yigit bir fikrga keldi: u imkoniyatdan foydalanishga qaror qildi va ulkan idishlarda taom tayyorlashni boshladi. Shunday qilib, bir vaqtning o‘zida ikkita tuyaqush tuxumidan omlet pishiradigan oshpaz, shunigdek, bir metr uzunlikdagi kabob va ko‘proq to‘y tortiga o‘xshash burger haqidagi mish-mish butun mamlakat bo‘ylab tarqaldi.

Biznes shu qadar muvaffaqiyatli bo‘ldiki, bir necha yil o‘tgach, Burak Istanbulga ko‘chib o‘tishga qaror qildi va u yerda, shahar markazida yangi, eng muhimi o‘zining “Hatay Medeniyetler Sofrasi” restoranini ochishga qaror qildi. Muassasa nomi tasodifan tanlanmagan. Birinchi so‘z Hatay Turkiyaning janubidagi mintaqadir. Dastlab Burakning oilasi aynan shu yerda istiqomat qilgan.

Bugungi kunda “Hatay Medeniyetler Sofrasi” nafaqat mahalliy aholi, balki butun dunyodan kelgan sayyohlar orasida ham juda mashhur. Istanbulda ushbu tarmoqning bir nechta restoranlari mavjud va Ozdemir Yaqin Sharqda yangi muassasalar ochishni rejalashtirmoqda.

Hozirda Burakning restoranlari o‘zining ulkan ovqatlari bilangina emas, balki turli xil servislari bilan ham mashhur. Menyuda 150 dan ortiq taomlar mavjud bo‘lib, ularning har biri uchun alohida xizmat ko‘rsatiladi. “Hatay Medeniyetler Sofrasi”ning o‘ziga xos xususiyati mijozning nomi yozilgan pishiriqlardir. Burak taomning tashqi ko‘rinishi ta’midan kam emas, deb hisoblaydi.

Burak Ozdemir o‘zining ijtimoiy tarmoqlari – You tube va Instagram’da oshpazlikning asl durdonalarini e’lon qiladi. U oddiy oshpazlikdan nafaqat oshpazlik san’atining haqiqiy professionaliga, balki ijtimoiy tarmoq yulduziga ham aylandi. Oshpazning Instagram blogida 38 millionga yaqin obunachi mavjud. 

Bundan tashqari CZN Burak dunyoning eng mashhur shahslari (futbolchilar, aktyorlar,media vakillari) va iijtimoiy ko‘makka muhtoj bolalar bilan uchrashib, ular bilan birga taom tayyorlaydi.

So‘nggi kunlarda uning saratonga chalingani haqida xabarlar tarqaldi. Biroq Ozdemir sog‘ligi bilan bog‘liq vaziyatda barchasi joyida ekanini ma’lum qildi.

Bugungi kunda uning shaxsiy boyligi 11,2 mln. AQSH dollariga teng.

• Burak
• Oshpaz
• Turkiya