Senatning Agrar, suv xo‘jaligi masalalari va ekologiya qo‘mitasi raisining o‘rinbosari Sayyora Abdikarimova tomonidan Toshkent shahar hokimi Shavkat Umurzoqovga Yunusobod tumani Namangan ko‘chasi 1-uy manzilida joylashgan sobiq 1-sonli tergov hibsxonasi hududiga zamonaviy xiyobon barpo etilishi masalasi yuzasidan 6-oktyabrda senator so‘rovi yuborilgandi. Hokimlik bunga javoban 13-oktyabrda tegishli ma’lumotnoma yo‘lladi. Senat matbuot xizmati uni 6-noyabrda e’lon qildi.

Yunusobod tumani Namangan ko‘chasi 1-uyda joylashgan sobiq 1-sonli tergov hibsxonasi bino-inshootlari va unga tegishli hudud 2018-yilda Toshkent shahar hokimligi balansiga o‘tkazilgan edi. Hujjat bilan mazkur hududda barcha zarur infratuzilmaga ega zamonaviy xiyobon (dam olish maskani) barpo etish vazifasi yuklatilgandi. Xalq orasida “Toshturma” nomi bilan mashhur bo‘lgan mazkur hibsxona o‘sha yilning yanvar oyida Zangiota tumaniga ko‘chirilgan edi.

Biroq oradan ancha vaqt o‘tganiga qaramay, farmoyishda belgilangan vazifalar ijrosi hanuzgacha to‘liq ta’minlanmagani, hudud qarovsiz holatda qolayotgani, ayrim qurilish kompaniyalari tomonidan esa hududdan xususiy manfaatlarda foydalanishga bo‘lgan urinishlar kuzatilayotgani fuqarolarning haqli e’tirozlariga sabab bo‘layotgani tufayli senator so‘rovi yuborilgandi.

Toshkent shahar hokimining  2020-yil 7-oktyabrdagi qaroriga asosan Ogneupor korxonasiga Chinobod ko‘chasidagi o‘ziga tegishli obyekt buzib tashlangani uchun kompensatsiya sifatida 2,9 gektar yer maydoni (sobiq tergov hibsxonasi hududi) berilgan hamda kadastr hujjatlari shakllantirilib, yer uchastkasidan doimiy foydalanish huquqi 2021-yil 5-oktyabrda davlat ro‘yxatidan o‘tkazilgan.

Yunusobod tumani Qurilish boshqarmasi Arxitektura-shaharsozlik kengashi xulosasi asosida 76 kvadrat metr maydonga ega ma’muriy bino loyihasi tasdiqlangan. Qurilish 2024-yil 6-aprelda foydalanishga topshirilgan bo‘lib, obyekt noturar joy sifatida ro‘yxatdan o‘tkazilgan. Keyinchalik ushbu uchastka konservatsiya zonasiga kiritilgan, ya’ni qo‘shimcha turar joy va noturar joy obyektlarini qurish taqiqlangan.

Ishchi guruh tomonidan holat hududga chiqqan holda o‘rganilib, jamiyat rahbari bilan suhbatlashilganida ma’lum bo‘lishicha, kompensatsiya tariqasida olib qo‘yilgan Chinobod ko‘chasi 8-uy manzilda joylashgan yer maydonida dastlab korxona yong‘inga chidamli materiallar ishlab chiqarish uchun sanoat obyektini qurishni rejalashtirgan.  Biroq yer maydoni to‘liq aholi punktida joylashgani, atrofi to‘liq uy-joylar bilan qamrab olingani sababli ishlab chiqarish korxonasi qurish mumkin emasligi ma’lum bo‘lgan. Shu sababli  zamonaviy mehmonxona qurishga qaror qilingan, biroq hozirda loyihani amalga oshirish uchun mablag‘ yetishmayapti.

Hokimlik xatida keltirilishicha, 2022-yilda, so‘ngra 2025-yil fevral-avgust oylarida korxona 2,9 gektar yer maydonini xususiylashtirish uchun ariza topshirgan. Biroq, Toshkent shahrining Bosh rejasiga ko‘ra, uchastka konservatsiya zonasiga kiritilgani sababli ular rad etilgan. Korxona rahbariyati uchastka konservatsiya zonasidan chiqarilgan taqdirda investorni jalb qilib, mehmonxona va maishiy xizmat ko‘rsatish obyektlari bo‘lgan ko‘p qavatli turar joy binosini qurish loyihasini amalga oshirish niyatida.

• Hokimlik
• Loyiha
• So‘rovnoma