Futbol bo‘yicha O‘zbekiston U-20 terma jamoasi Argentinada o‘tadigan Jahon chempionati oldidan Urugvay bilan o‘rtoqlik o‘yini o‘tkazadi. Bu haqda O‘FA matbuot xizmati ma’lum qildi.

Ravshan Haydarov murabbiyligidagi jamoa mundial oldidan Urugvayda yig‘in o‘tkazadi. Yig‘in doirasida o‘zbekistonlik yosh futbolchilar 13-may kuni Urugvayga qarshi o‘rtoqlik o‘yinida ishtirok etadi.

Ma’lumot uchun, Urugvay yoshlari U-20 Janubiy Amerika chempionatida ikkinchi o‘rinni qo‘lga kiritgan.
U-20 Jahon chempionati 20-maydan 11-iyunga qadar Argentinada bo‘lib o‘tadi.

O‘zbekiston U-20 terma jamoasi musobaqaning A guruhidan joy olgan va unda Argentina, Gvatemala, Yangi Zelandiya kabi jamoalar bilan o‘ynaydi.

Osiyoning amaldagi chempionlari 20-may kuni musobaqaning ochilish o‘yinida Argentinaga qarshi maydonga tushadi. 23-mayda Yangi Zelandiya, 26-mayda esa Gvatemala bilan o‘yinlar belgilangan.

Ayni vaqtda O‘zbekiston U-20 terma jamoasi Ispaniyada yig‘in o‘tkazmoqda. Jamoa 22-aprel kuni Braziliyaga qarshi o‘rtoqlik o‘yini o‘tkazib, yirik hisobda yutqazdi (1:4).

Yig‘in doirasida vakillarimizni Dominikan Respublikasi (25-aprel) va Gibraltarga (27-aprel) qarshi o‘yinlar kutib turibdi.

• Futbol
• O‘zbekiston
• U-20
• Urugvay