Arxeologlar Misr mamlakatidagi “Xeops” piramidasining asosiy kirish eshigi yonida uzunligi 9 metr bo‘lgan yashirin yo‘lak mavjudligini aniqlashdi. “Nature” jurnalida chop etilgan maqolada bu katta yangi kashfiyotlarga olib kelishi mumkinligi ma’lum qilingan.

Misr antiqa buyumlar xizmati rahbari Mustafo Vaziriyning so‘zlariga ko‘ra, yo‘lak Giza shahridagi yodgorliklarni skanerlash natijasida aniqlangan. Kirish joyi piramidaning shimoliy tomonida, yer sathidan taxminan 20 metr balandlikda joylashgan va tosh plitalar orqasida “yashiringan”.

Qayd etilishicha, uning nima maqsadda yaratilgani haqida izlanishlar olib borish kerak, ammo ushbu yo‘lak struktura ichidagi vaznni qayta taqsimlash uchun yaratilgan, degan taxminlar mavjud.

“Biz ushbu koridor ostida yoki oxirida nimani topishimiz mumkinligini ko‘rish uchun skanerlashni davom ettiramiz”, – deydi Misr antiqa buyumlar xizmati rahbari Mostafa Vaziri.

2015-yildan beri olimlar “Xeops” piramidasini invaziv bo‘lmagan texnologiyalar, jumladan, infraqizil termografiya va 3D modellashtirishdan foydalangan holda tadqiq qilmoqda. Shunday qilib, ilm-fan fidoyilari dunyoning yetti moʻjizalaridan yagona omon qolgan tarixiy obidani tekshirishga muvaffaq bo‘lishadi.

“Xeops” piramidasi (“Buyuk Giza” piramidasi) taxminan 4500 yil oldin fir’avn Xufu (shuningdek, “Xeops” deb ataladi) davrida monumental qabr sifatida qurilgan. Uning balandligi 139 metrni tashkil qiladi. 1889-yilda Parijda “Eyfel” minorasi paydo bo‘lgunga qadar ushbu obida inson tomonidan yaratilgan eng baland inshoot edi.

Ushbu kashfiyotdan avval 2017-yilda piramida keng ko‘lamli o‘rganilgan edi. Keyin “Scan Pyramids” “Buyuk Giza” piramidasi ichida kamida 30 metr uzunlikdagi bo‘shliq topilgani ma’lum qilingan.

• Misr
• Piramida