“Ланcет” лабораторияси кенг кўламли тадқиқотни эълон қилди, унинг муаллифлари спиртли ичимликларни истеъмол қилишнинг соғлиқ учун фойда ёки зарарлари тўғрисидаги ҳисоботлар қанчалик ҳақиқатга яқин эканлигини синаб кўришга қарор қилишди. 2020 йилги Глобал касаллик юки сўрови статистик маълумотларидан фойдаланиб, улар 204 мамлакат ва ҳудудларда 15 ва ундан катта ёшдаги одамларнинг спиртли ичимликларни истеъмол қилиш даражасини аниқлашга муваффақ бўлишди.

Шу тариқа олимлар 2020 йилда 1,34 миллиард одам хавфли миқдорда спиртли ичимликлар истеъмол қилишини қайд этишди. Уларнинг 76,7 фоизи эркаклар бўлиб, 59,1 фоизи 40 ёшгача бўлганлар ҳисобланади.

Спиртли ичимликларни истеъмол қилиш билан боғлиқ хавф эркаклар ва аёллар учун бир хил бўлса-да, 15 ёшдан 39 ёшгача бўлган эркаклар спиртли ичимликлардан энг юқори хавф остида бўлади. Чунки улар кўпроқ ва нисбатан тезроқ ичишади, бу уларнинг соғлиғига салбий таъсир қилади. Шунингдек, ушбу ёшдаги “гуруҳ” вакиллари йўл-транспорт ҳодисалари қурбонларининг 60 фоизини ташкил қилади.

Олимлар стандарт ичимликларда алкоголнинг дозасини ўлчаб кўришди. Бир стакан (энг камида 30 мл) ароқ таркибида 40 фоиз, 100 мл шароб таркибида 13 фоиз ёки 375 мл пиво таркибида 5 фоизгача алкоголь мавжуд. Таҳлилларга кўра, 40 ёшгача бўлган эркаклар учун хавфсиз доза кунига атиги 0,136 стаканни ташкил қилади ва бу чегарадан ошиб кетганда соғликка жиддий зарар етиши эҳтимоли юқори. Худди шу ёшдаги аёллар эса тахминан икки баробар кўпроқни ташкил этади.

40-64 ёшдаги одамлар учун эса тавсия қилинган миқдор кунига 0,5 дан 1,81 стакангача. Аммо 65 ёшдан ошган одамлар спиртли ичимликларни соғлиғига салбий таъсир кўрсатмаслиги ҳақида аниқ тиббий кўрсатмага эга бўлсагина, кунига 3,5 стакан истеъмол қилишлари мумкин экан.

Шу билан бирга, спиртли ичимликларни ўртача даражада истеъмол қилиш жиддий соғлиқ муаммолари бўлмаган 40 ёшдан ошган одамларда юрак хасталиги, инсульт ва диабет хавфини камайтириши қайд этилган.

• Aлкогол
• Olimlar
• Spirt
• саломатлик