Tolibon Afg‘onistonda internet butunlay uzilgani haqidagi xabarlarni rad etdi. Al Jazeera xabariga ko‘ra, Tolibon bu holatni “eskirgan tolali-optik kabellarni almashtirish bilan bog‘liq vaqtinchalik texnik muammo” deb izohladi.

“Internetni taqiqlaganimiz haqidagi gaplar asossiz”, — deyiladi Tolibonning rasmiy bayonotida.

Biroq, Netblocks global tarmoq kuzatuv tashkiloti 29-sentyabr kuni Afg‘onistonda — 43 million aholiga ega mamlakatda — to‘liq internet bloklanganini qayd etdi. Telefon aloqasida ham muammolar yuzaga kelgan.

Tolibon avval ham ayrim viloyatlarda “axloqiy buzilishlarga qarshi kurash” sababli internet xizmatlarini cheklab kelgan. Misol uchun: Sentyabr oyida Balx viloyatida tolali-optik internet butunlay to‘xtatilgan.

Badaxshon, Taxor, Hilmand, Qandahor va Nangarhor viloyatlarida ham shunga o‘xshash cheklovlar joriy etilgan.

TOLOnews telekanali xabariga ko‘ra, Tolibon mobil qurilmalarda 3G va 4G xizmatlarini bir hafta ichida to‘xtatish bo‘yicha topshiriq bergan. Mahalliy manbalarga ko‘ra, 8 mingdan ortiq aloqa ustunlari vaqtincha o‘chirilgan.

Internetning uzilishi nafaqat shaxsiy muloqot, balki aviatsiya, bank tizimi va savdo faoliyatiga ham salbiy ta’sir ko‘rsatgan. Bu voqea mamlakat sharqida 2 mingdan ortiq odam halok bo‘lgan kuchli zilziladan atigi bir necha hafta o‘tib sodir bo‘ldi. 1-oktyabr kuni mamlakatda internet va aloqa xizmatlari qayta tiklangan.

• Afg‘oniston
• Internet
• Tolibon