Yevropa Chempionlar ligasi birinchi yarimfinal javob o‘yini doirasida “Inter” o‘z uyida “Barselona” bilan ekstra taymlargacha o‘ynab, 2024-2025–yilgi mavsum finaliga yo‘llanmani qo‘lga kiritdi.

O‘yin qizg‘in va murosasiz kurashlarga boy tarzda boshlandi, uchrashuvning 21-daqiqasida Martines mezbonlarni hisobda oldinga olib chiqdi.

Birinchi taymga qo‘shib berilgan dastlabki daqiqada Chalxano‘g‘lu belgilangan penaltini golga aylantirdi. Hisob 2:0 mezbonlar foydasiga.

Ikkinchi taym boshida Erik Garsiya hisobni qisqartirdi. Goldan ruhlangan kataloniyaliklar 60-daqiqada Dani Olmoning bosh bilan kiritgan ajoyib golidan keyin hisobni tenglashtirdi – 2:2.

O‘yinning 87-daqiqasiga kelib, Rafinya “Barselona”ni hisobda oldinga olib chiqdi.

Asosiy vaqtga qo‘shib berilgan daqiqalarning so‘nggisida Acherbi o‘zining Yevrokuboklardagi debyut golini urib, jamoasini muqarrar mag‘lubiyatdan qutqarib qoldi. Hisob esa 3:3, navbat qo‘shimcha bo‘limlarga.

Ekstra-taymlarning birinchisida gol urgach himoyalanib xato qilgan va bundan xulosa qilgan milanliklar oldinga o‘tdi. 98-daqiqada zaxiradan o‘yinga qo‘shilgan Fratezzi jamoasining kombinatsiyasini chiroyli yakunlab, “Inter”ni yana hisobda oldinga olib chiqdi. Qo‘shimcha bo‘limning ikkinchisida kataloniyaliklarda bir qancha vaziyatlar bo‘lsa-da, yakunda hisob o‘zgarmadi. Italiya jamoasi 4:3 hisobida g‘alaba qozondi va so‘nggi 3 yilda 2-marta YeChL finaliga yo‘llanma oldi.

Ma’lumot uchun, bugun finalning ikkinchi yo‘llanmasi uchun bahsda PSJ o‘z uyida “Arsenal”ni qabul qiladi. Ushbu bahs Toshkent vaqti bilan 23:59 da start oladi.

• Barselona
• Futbol
• Inter
• YeChL