Овоз бериш якунлари бўйича Қирғиз Республикаси Президенти Садир Жапаров, Тожикистон Президенти Имомали Раҳмон ва Ўзбекистон раҳбари Шавкат Мирзиёев Лев Толстой номидаги иккинчи халқаро тинчлик мукофоти совриндорлари деб эълон қилинди. Тантанали маросим Москвада таниқли ёзувчи ва файласуф Лев Толстойнинг туғилган кунида бўлиб ўтди.

“Л. Н. Толстой номидаги халқаро тинчлик мукофоти ҳакамлар ҳайъати қарори билан 2025 йилда Қирғиз Республикаси Президенти Садир Жапаров, Тожикистон Президенти Имомали Раҳмон, Ўзбекистон Республикаси Президенти Шавкат Мирзиёев мукофотнинг совриндорлари деб эълон қилинди. Қарор бир овоздан қабул қилинди” - деди ҳакамлар ҳайъати раиси, Мариинский театрининг бадиий раҳбари ва бош директори, Москва катта театрининг бош директори Валерий Гергиэв.

Мукофотнинг ташкилий қўмитаси таъкидлаганидек, учта мамлакат раҳбарлари Марказий Осиё минтақасида тинчлик ва хавфсизликни мустаҳкамлашга қўшган катта шахсий ҳиссалари учун ушбу фахрий мукофотга сазовор бўлишди. Улар 31 март куни Ўзбекистон, Тожикистон ва Қирғизистон давлат чегаралари туташган жой тўғрисида шартнома имзолаганини, умумий чегараларнинг ҳуқуқий расмийлаштирилишини тўлиқ якунлаганини ва “шу билан халқаро ҳуқуқ устуворлиги асосида умумий ва тенг хавфсизликни таъминлашга, халқлар ўртасида ўзаро тушуниш ва ҳамкорликни мустаҳкамлашга салмоқли ҳисса қўшгани” таъкидланди.

Л. Н. Толстой номидаги халқаро тинчлик соврини 2022 йил 22 июнь куни Россия тарихий жамияти, Россия тинчлик жамғармаси ва Россия ҳарбий-тарихий жамияти томонидан таъсис этилган.

Халқаро тинчлик мукофотини расман топшириш маросими яқин орада эълон қилинади.

• Мукофот
• Президент
• Шавкат Мирзиёев
• Tinchlik shartnomasi