Britaniya parlamentida farrosh bo‘lib ishlagan Mulikat Ogunmode kuniga 17 soatlab mehnat qilgani ma’lum bo‘lgach, ishdan bo‘shatildi. Bu haqda Daily Mail nashri xabar berdi.

Ma’lumotlarga ko‘ra, Ogunmode 2008-yildan 2024-yilgacha ikki joyda — kunduzi Deutsche Bank’da, kechqurun esa Buyuk Britaniya parlamentida ishlagan. U muntazam ravishda ikki ish o‘rtasidagi minimal 11 soatlik dam olish vaqti talabini buzgan. Bunday holat Britaniya mehnat qonunchiligiga zid hisoblanadi.

Parlamentda ushbu holat fosh etilgandan so‘ng, Ogunmode qonunbuzarlik sababli ishdan bo‘shatildi. U ish beruvchiga nisbatan sudga murojaat qilib, o‘zini noqonuniy ravishda ishdan bo‘shatishganini va ish haqidan noadolatli ushlab qolishlar bo‘lganini da’vo qildi. Biroq sud uning talablarini rad etdi.

Sudya ta’kidlashicha, Ogunmodening harakatlari qonunga zid bo‘lib, bu nafaqat uning sog‘lig‘i va xavfsizligiga, balki jamiyat manfaatlariga ham tahdid solishi mumkin. Shuningdek, u ikkinchi ish joyi haqida ish beruvchiga haqiqiy ma’lumot bermagani uchun ham javobgarlikka tortilgan.

• Britaniya