Britaniyaning Tilberi shahridagi “Amazon” omborida ishlaydigan yuzlab ishchilar ish haqining pastligidan norozilik bildirish uchun o‘z ishlarini tashlab ketishdi. Bu haqda GMB kasaba uyushmasi ma’lum qildi. Xodimlar ish beruvchi kompaihniyani mamlakatda yashash narxining oshishi fonida ish haqini yetarli darajada oshirmayotgani uchun tanqid qilishgan.

“Amazon” ko‘plab mamlakatlardagi ishchilarning oylik maoshi va ish sharoitlari haqida shikoyatlariga duch keldi. GMB vakillari kompaniya kasaba uyushmalari bilan hamkorlik qilishdan bosh tortishda davom etayotganini ta’kidladi. Qayd etilishicha, “Amazon” qisqa muddatli shartnomalardan qayta foydalanadi.

“Bu esa ishchilarning huquqlarini buzadi”, – deydi kasaba uyushmasi rasmiylari.

GMB ma’lumotlariga ko‘ra, 3 va 4 avgust kunlari 800 nafar ombor ishchisi kompaniyani tark etgan. Xodimlar “Amazon”ni ish haqi soatiga qo‘shimcha 35 pensga oshirilmagani uchun tanqid qilishgan. Kasaba uyushmalari esa bu miqdor 2 funt sterlingga oshishi kerakligini talab qilmoqda.

“Amazon”ning Buyuk Britaniyada 70 000 dan ortiq xodimi bor. Kompaniya vakillarining ta’kidlashicha, ombor ishchilarining boshlang‘ich maoshi soatiga 10,50 funt sterlingdan 11,45 funt sterlinggacha oshirilishi rejalashtirilgan.

Buyuk Britaniya bo‘ylab ishchilar, jumladan, temir yo‘llar, aviakompaniyalar va telekommunikasiya sohasi xodimlari so‘nggi oylarda ish tashlashga chiqdilar, chunki ish haqi tovar narxining oshishi bilan barobar emas.

O‘tgan oy o‘rtalarida “Amazon” 2022 yil oxirigacha Buyuk Britaniyada 4000 ta ish o‘rni yaratishni rejalashtirayotganini e’lon qilgan edi. Shunda kompaniyaning mamlakatdagi umumiy xodimlari soni 75 ming kishiga yetadi, deb xabar beradi BBC.

Bunga qadar “Amazon” 2021 yil davomida Buyuk Britaniyada 25 000 yangi ish o‘rni yaratgan va to‘rtta yangi ombor ochgan.

• Amazon
• Buyuk Britaniya
• Ish staji