Bugungi kunga kelib, tomoshabinlarda animatsion filmlar faqat bolalar uchun degan fikr paydo bo‘lgan. Buning o‘ziga xos sababi ko‘plab multfilmlarning ma’no va mazmun jihatdan sayozligidir. Ammo biz bilgan bir nechta multfilmlar chuqur ma’noga ega bo‘lib, nafaqat bolalar, kattalar ham tomosha qilishi tavsiya etiladi.

10. “Boshqotirma” (2015)

Multfilmda har bir inson tuyg‘ularining o‘rni beqiyosligi, kezi kelganda qayg‘u ham yaxshi voqealarga sabab bo‘lishi, oila va do‘stlar davrasida hissiyotning mavqeyi ko‘rsatib berilgan. Animatsiyaning bosh direktori  hamda muallifi Pit Dektor hisoblanadi.

9. “Minionlar” (2015)

“Minionlar” “Yaxshi bo‘lish osonmi” multfilmining nafaqat davomi, balki franshizaning asosiy animatsiyalaridan biri hisoblanadi. Multfilmda minionlar kichik xizmatkor mavjudodlar bo‘lib, ular yovuz odamga xizmat qilish orqali o‘zlarini baxtli his qilishadi. Shuningdek, ularning qiziqarli sarguzashtlari ham, har qanday yoshdagi tomoshabinni qiziqtirib qo‘yishi tabiiy.

8. “Nemoni izlab” (2003)

“Nemoni izlab” - bu Nemoning otasi uni topishi haqidagi hikoya. Ushbu film tavakkal qilish, xavf-xatarga duch kelish, xavfsiz hududni tark etish va hokazolar kabi haqiqatda kuchli hayotiy saboqlarga to‘la. Animatsiyaning “Dorini izlab” nomli davomi ham mavjud. 

7. “Ratatuy” (2007)

“Pixar studios”ga tegishli ushbu multfilmda oshpaz bo‘lishni orzu qilgan kalamush haqida hikoya qilinadi. Animatsiya fransuz taomlaridan birining nomi bilan atalgan. Bu multfilmda qanday bo‘lishingdan qat’iy nazar, maqsadlar yo‘lida to‘xtamaslik bosh g‘oya qilib olingan.

6. “Qirol Sher” (1994)

Simba haqidagi ertak Shekspirning “Gamlet” pyesasidan ilhomlanib ishlangan. Multfilm 1994-yilda  taqdim etilgan. Animatsiyani Rob Minkoff va Rojer Allers boshqargan. Multfilm hozirgi kungacha barcha yoshdagi tomoshabinlar uchun qiziqarli deya e’tirof etiladi.

5. “Kung-Fu Panda” (2008)

Har bir inson “Kung-Fu Panda”ni harakat va hazil tufayli yaxshi ko‘radi . Ushbu Amerika filmi sizga Xitoy filmlaridan ko‘ra sharq mamlakati haqida ko‘proq narsalarni o‘rgatadi. Animatsiyaning bugunga qadar uchta qismi taqdim etildi va ularning barchasi tomoshabinlar tomonidan iliq qarshi olindi.

4. “Vall-I” (2008)

Bu film chiqindilar, ifloslanish va nostalji kabi ko‘plab tajriba va muammolar haqida gapiradi. Filmda asosiy maqsadi tashlab ketilgan barcha chiqindilarni tozalash va yerni yashashga yaroqli holga keltirish bo‘lgan yolg‘iz robot haqida hikoya qilinadi.

3. “O‘rgimchak odam: Yondosh olamlar” (2018)

Bugungi davrning noyob animatsiyasi bo‘lgan “O‘rgimchak odam” franshizasining ilk multfilmi 2018-yilda ekranlarga chiqqan. Film barcha o‘rgimchak odamlarni yoqtiradigan va super qahramonga aylangan Miles Morales haqida.

2. “Rango” (2011)

Bu multfilm buqalamunning sayohati haqida hikoya qiladi. Unda qahramon hayvonlarning suvga bo‘lgan ehtiyojini qondirish uchun yordam beradi. Ushbu animatsion film g‘ayrioddiy hazil , ta’sirchan musiqa, satira va ajoyib qahramonlik kabi bir qancha ijobiy hislatlarga ega.

1. “Molxona” (1954)

1954-yilgi multfilm mashhur yozuvchi Jorj Oruellning eng yaxshi asarlaridan biriga asoslangan. Hikoya barcha hayvonlar teng bo‘lgan jamiyatda yashashni xohlaydigan qishloq xo‘jaligi hayvonlarining isyonchi guruhi haqida. Multfilmda o‘ziga xos kulgi, satira va jamiyatdagi muammolar hayvonlar orqali ko'rsatilgan.

• Lifestyle
• Multfilm
• qiziqarli